پشاور: مشیر اطلاعات خیبرپختونخوا بیرسٹر سیف نے کہا ہے کہ (ن) لیگ کے اندر اقتدار کی لڑائی منطقی انجام کو پہنچنے والی ہے، حکومت مخالف تحریک کا آپشن کھلا ہے، پابندی کا فیصلہ ان کے گلے پڑے گا، ہر میدان میں مقابلہ کریں گے۔
تفصیلات کے مطابق ایک بیان میں مشیر اطلاعات خیبرپختونخوا بیرسٹر سیف نے کہا کہ پی ٹی آئی پر پابندی کے حکومتی فیصلے سے کوئی اثر نہیں پڑے گا، ان کو پی ٹی آئی پر پابندی لگانے کا کوئی اختیار نہیں ہے ۔انہوں نے کہا کہ ہم انہیں چیلنج کرتے ہیں، آئیں ہمت کریں، سپریم کورٹ جائیں،ان کا فیصلہ ان کے گلے پڑے گا، ہم ان کا ہر میدان میں مقابلہ کریں گے۔
انہوں نے کہا کہ آرٹیکل 6اور پی ٹی آئی پر پابندی کا فیصلہ (ن) لیگ کے اندرونی خلفشار کا نتیجہ ہے، (ن) لیگ کے اندر اقتدار کی لڑائی منطقی انجام کو پہنچنے والی ہے۔
انہوں نے کہا کہ 8فروری کو پی ٹی آئی مقبول ترین جماعت کے طور پر ابھری ہے، سپریم کورٹ میں مخصوص نشستوں کے کیس پر وفاقی حکومت کو سبکی ہوئی۔انہوں نے کہاکہحکومت مخالف تحریک کا آپشن کھلا ہے، اسلام آباد میں عنقریب جلسہ کریں گے۔
