لاہور: وزیراعلی پنجاب مریم نواز نے کہا ہے کہ ہر نوجوان کو معاشی خود مختاری کیلئے ہنر مند بنانا ہمارا وژن ہے،چیف منسٹر سکلز ڈویلپمنٹ انیشی ایٹو کے تحت ٹیوٹا کورسز کیلئے طلبہ کی تعداد 40 ہزار تک کریں گے۔
تفصیلات کے مطابق ورلڈ یوتھ سکلز ڈے کے موقع پر اپنے پیغام میں وزیراعلیٰ پنجاب مریم نواز نے کہا کہ ورلڈ یوتھ سکلز ڈے پائیدار مستقبل کی تعمیر میں نوجوانوں کے اہم کردار کو سمجھنے کا دن ہے، ہنر مند نوجوان ہی ہماری سرمایہ کاری اور اثاثہ ہیں۔
انہوں نے کہا کہ نوجوانوں کو تیزی سے بدلتی ہوئی دنیا میں ترقی کیلئے درکار مہارتوں سے روشناس کرانا چاہئے، پنجاب حکومت نوجوانوں کو پیشہ ورانہ تربیت کے مواقع فراہم کرنے کیلئے پرعزم ہے۔ انہوں نے کہا کہ عالمی جاب مارکیٹ میں مسابقت کیلئے نوجوانوں کیلئے انفارمیشن اینڈ کمیونیکیشن ٹیکنالوجی ناگزیر ہے، چیف منسٹر سکلز ڈویلپمنٹ انیشی ایٹو کے تحت ٹیوٹا کورسز کیلئے طلبہ کی تعداد بتدریج 40 ہزار تک کریں گے۔
انہوں نے کہا کہ طلبہ کیلئے انفارمیشن ٹیکنالوجی میں مڈل ٹیک، میٹرک ٹیک اور انٹرمیڈیٹ ٹیک متعارف کرا رہے ہیں،ہر نوجوان کو معاشی خود مختاری کیلئے ہنر مند بنانا ہمارا وژن ہے۔
