پشاور: مشیر اطلاعات خیبر پختونخوا بیرسٹر سیف نے کہا ہے کہ مخصوص نشستوں کے فیصلے سے جعلی سلطنت کی بنیادیں ہل گئیں،شہباز اور مریم جعلی سلطنت کو دم سے پکڑنے کی ناکام کوشش کررہے ہیں، لندن پلان تہس نہس ہوچکا، عوام لندن بھاگنے والوں پر نظر رکھیں۔
تفصیلات کے مطابق ایک بیان میں مشیر اطلاعات خیبرپختونخوا بیرسٹر سیف نے کہا کہ پشتو میں کہاوت ہے کہ گدھے کو دْم سے پکڑنے کی کوشش کی جا رہی ہے، شہباز شریف اور مریم نواز اپنی جعلی سلطنت کو دْم سے پکڑنے کی ناکام کوشش کر رہے ہیں، دونوں کے ہاتھوں میں صرف دم ہی بچی ہے باقی سلطنت ہاتھ سے نکل چکی ہے۔
انہوں نے کہا کہ لندن پلان تہس نہس ہوچکا ہے، عوام لندن بھاگنے والوں پر خصوصی نظر رکھیں، اس بار پلیٹ لیٹس گرنے کے بہانے نہیں چلیں گے، فرائی پین سے کپڑے پریس کرنے کا ڈرامہ سیزن بھی شروع ہونے والا ہے۔انہوں نے کہا کہ صرف مخصوص نشستوں کے فیصلے کے بعد جعلی سلطنت کی بنیادیں ہل گئیں، الیکشن ٹریبونل کے فیصلے آنا ابھی باقی ہیں، ٹریبونل کے انصاف پر مبنی فیصلوں سے فارم 47 کا سارا کچا چٹھا کھل جائے گا۔
انہوں نے کہا کہ فارم 47 پر بنی حکومت کی بنیادیں اتنی کمزور ہیں کہ جعلی سلطنت کو چند ماہ کا سہارا بھی نہیں دے سکیں۔
