اسلام آباد: وزیراعظم شہباز شریف نے چند دنوں میں 5 سالہ معاشی پلان پیش کرنے کا اعلان کرتے ہوئے کہا ہے کہ ملکی معاشی ترقی کیلئے اپنی جان لڑادوں گا، 77سال کے دوران بحیثیت قوم ہمارا سفر قابل رشک نہ ہوسکا،بحیثیت قوم ہمیں اپنا احتساب کرنا،ماضی سے سبق حاصل کرکے منصوبہ بندی کرنا ہوگی،دشمن نے ڈیجیٹل دہشتگردی کا ہتھیار استعمال کر کے نوجوان پر جھوٹ کی بمباری کر رکھی ہے،بجلی بلوں میں کمی کے بغیر ملک آگے نہیں بڑھ سکتا، چند دنوں میں عوام کو خوشخبری ملے گی۔
تفصیلات کے مطابق 77 ویں یوم آزادی پر اسلام آباد میں منعقدہ ایک تقریب سے خطاب کرتے ہوئے وزیراعظم شہباز شریف نے یوم آزادی کی مبارکباد پیش کرتے ہوئے کہا کہ اللہ تعالیٰ کا شکر ادا کرتے ہیں کہ ہمیں آزادی جیسی نعمت سے نوازا،آزادی کیلئے ہمارے بزرگوں نے عظیم قربانیاں دیں۔
انہوں نے کہا کہ1947ء کو پاکستان ہندوستان سے الگ ہوکر ایک اسلامی فلاحی مملکت بنا تاہم77سال کے دوران بحیثیت قوم ہمارا سفر قابل رشک نہ ہوسکا، معیشت سمیت دیگر شعبوں میں بتدریج زوال آتا رہا، کئی حادثات ہوئے، قومی وجود پر کئی کاری ضربیں لگیں، اندرونی اور بیرونی سازشیں، مفادر پرستیاں اور ہماری اپنی غلطیاں سب ہی مل کر اس میں شامل تھیں، ہم ہچکولے کھاتے رہے،یقینا آج ہمیں دیانتدای اور غیر جانبداری سے سوچنے، محاسبے کی ضرورت ہے، بحیثیت قوم ہمیں اپنا احتساب کرنا چاہئے اور ماضی سے سبق حاصل کرکے منصوبہ بندی کرنا ہوگی۔
انہوں نے کہا کہ احساس ہے بجلی بلوں اور مہنگائی سے عوام پریشان ہیں، آخر ہم اس حالت میں کیوں اور کیسے پہنچے؟، اس کا جواب ہمیں تلاش کرنا ہے، جس طرح یہ سچائی ہے کہ سب اچھا نہیں ہے، تو یہ بھی سچائی ہے کہ سب بْرا بھی نہیں ہے۔
انہوں نے کہا کہ جس وطن کے بارے میں دشمنوں نے پیشگوئی کی تھی کہ یہ وطن قائم نہیں رہے گا، آج 77 سال بعد بھی قائم ہے اور قیامت تک قائم رہے گا، میں آج ہر مزدور، دیہاڑی دار، وکلا، انجینئرز، ڈاکٹرز، طلبا، اہل قلم، شعرا اور صحافیوں کو بھی سلام پیش کرتا ہوں، کھیل کے میدان میں سر فخر سے بلند کرنے والے کھلاڑیوں کو بھی اور فنکاروں کو بھی سلام پیش کرتا ہوں۔
انہوں نے کہاکہ اپنے حالات کا جائزہ لے کر یہ فیصلہ کرنا ہوگا کہ زندگی قرضوں، کشکول، اور مانگ کر گزارنی ہے، یا پھر حضرت قائد اعظمؒ اور علامہ اقبالؒ کے فرمودات کے مطابق وہ زندگی گزارنی ہے، جس کے پاکستان وجود میں آیا، اور لاکھوں بزرگوں نے قربانیوں دیں۔
انہوں نے کہا کہ ناکامیوں کے مقدر کے درمیان ہمارے سائنسدانوں، سیاستدانوں، سپاہیوں،فوج اور پولیس نے دہشتگردی کے خاتمے کیلئے جانوں کا نذرانہ پیش کیا، وہ دن اس بات کا تقاضا کرتا ہے کہ ہم ان قربانیوں کیلئے ہمیں اپنا فرض ادا کرنا ہوگا۔
انہوں نے کہا کہ اس مہنگائی میں بجلی بلوں میں کمی کے بغیر پاکستان کی صنعت، زراعت، درآمدات نہیں بڑھ سکتی ہیں، نہ گھریلو صارفین کو تسکین مل سکتی ہے، انشااللہ اگلے چند دنوں میں آپ کو بجلی کے بلوں میں کمی سے متعلق خوشخبری ملے گی،چند دنوں میں قوم سے خطاب میں 5 سالہ معاشی پلان کا اعلان کروں گا، ساتھ ہی گزارش کروں گا کہ پلان تو بہت آئے، تقاریر بھی بہت ہوئے، لیکن قوموں کی تقدیر مسلسل محنت سے بدلتی ہے جیسے چین سمیت کئی ممالک نے پاکستان کے سفر کے بعد اپنا سفر شروع کیا مگر خطے میں آگے ہیں۔
میں یہ وعدہ کرتا ہوں کہ جب تک میری جان میں خون کا آخری قطرہ ہے، بجلی کی قیمت کو کم کرنے اور پاکستانی کی معیشت کو ابھارنے کیلئے اپنی جان لگا دوں گا، باقی اللہ کے ہاتھ میں ہے۔ انہوں نے کہا کہ آج کا پاکستان نوجوانوں کی وجہ سے جانا جاتا ہے، آپ ہی مستقبل ہو، خود کو پڑھائی اور ہنرمندی کیلئے وقف کریں، فساد، فریب اور فتنوں کے شر سے خود کو محفوظ رکھیں، دشمن قوتوں کا نشانہ آپ کا ذہن ہے، اور دشمنان پاکستان آج ہر حربہ استعمال کر رہا ہے جس سے ہمارا پاکستان آگے نہ بڑھ سکے، دشمن نے ڈیجیٹل دہشتگردی کے ہتھیار کو استعمال کر کے نوجوان پر جھوٹ کی بمباری کر رکھی ہے، شعور اور آگاہی انتشار نہیں لاتی، ہمیشہ ترقی اور خوشحالی، بات کرنے کا سلیقہ لاتی ہے۔ انہوں نے کہا کہ ہم پاکستان کی ترقی کیلئے دن رات کوشش کریں گے۔
