اسلام آباد: وزیر اطلاعات ونشریات عطا تارڑ نے کہا ہے کہ ارشد ندیم کی زندگی لاکھوں نوجوانوں کیلئے مشعل راہ ہے، کامیابی نے یوم آزادی کی خوشیوں کو دوبالا کردیا ہے، 126 ممالک کے شہریوں کیلئے ویزا فیس ختم کردی ہے، دیگر ممالک کیلئے بھی ویزا پالیسی نرم کررہے ہیں۔
تفصیلات کے مطابق اسلام آباد میں پریس کانفرنس کرتے ہوئے وزیراطلاعات عطاء تارڑ نے کہا کہ ہر طرف سے اچھی خبریں آرہی ہیں،ارشد ندیم کے گولڈ میڈل جیتنے پر پوری قوم خوش ہے،پاکستان کا 40 سال بعد ایسا اعزاز حاصل کرنا خوشی کا مقام ہے، ارشد کی کامیابی کے ساتھ ان کے کوچ بھی مبارکباد کے مستحق ہیں۔
انہوں نے کہا کہ ارشد ندیم کی فیملی کو پروٹوکول کیساتھ ملتان ایئر پورٹ سے لایا گیا وہ آج پاک فضائیہ کے خصوصی طیارے کے ذریعے اسلام آباد پہنچ رہے ہیں، کابینہ ارکان اپنے قومی ہیرو کا بھرپور استقبال کریں گے۔ انہوں نے کہا کہ ارشد ندیم کی وجہ سے پوری دنیا میں سبز ہلالی پرچم بلند ہوا، وہ (آج) بدھ کو 14اگست کی مرکزی تقریب میں بھی موجود ہوں گے، قومی ہیرو کے اعزاز میں خصوصی عشائیہ بھی دیا جائے گا۔
انہوں نے کہا کہ ارشد ندیم کا کارنامہ 92ء کے ورلڈکپ سے بھی بڑا ہے، اولمپین نے یوم آزادی کی خوشیوں کو دوبالا کردیا ہے۔ انہوں نے کہا کہ وزیر اعلیٰ پنجاب مریم نواز قومی ہیرو کے گھر گئیں اور 10 کروڑ اور گاڑی تحفے میں دی ہے۔ انہوں نے کہا کہ ارشد ندیم کی زندگی لاکھوں نوجوانوں کیلئے مشعل راہ ہے۔
انہوں نے کہا کہ پاکستان دیگر ممالک کیلئے ویزا پالیسی میں نرمی کررہا ہے، 126ممالک کے شہری آن لائن ویزا اپلائی کرسکتے ہیں، ان ممالک کے شہریوں کیلئے ویزا فیس ختم کردی گئی ہے۔
