پشاور: وزیراعلیٰ خیبرپختونخوا علی امین گنڈاپورنے دوران ڈیوٹی شہید ہونیوالے پاک فوج، ایف سی، پولیس ودیگر محکموں کے اہلکاروں کے اہل خانہ کو مفت پلاٹس دینے کا اعلان کرتے ہوئے کہا ہے کہ ہمارے محفوظ مستقبل کیلئے قربانیاں دینے والوں کا بدلہ کسی صورت نہیں چکایا جاسکتا، اقدام کا مقصد شہداء کے خاندانوں کو معاشی سپورٹ کرنا ہے۔
تفصیلات کے مطابق وزیراعلی خیبرپختونخوا علی امین گنڈاپور کی زیر صدارت محکمہ ہاؤسنگ کا اجلاس ہوا۔ اجلاس کے دوران دوران ڈیوٹی شہید ہونیوالے پاک فوج، ایف سی، پولیس، ریسکیو و دیگرمحکموں کے اہلکاروں کے اہل خانہ کو مفت پلاٹس دینے کا فیصلہ کیا گیا۔
وزیراعلیٰ علی امین نے کہا کہ پلاٹس الاٹمنٹ کا آغاز سرکاری ہاؤسنگ سکیموں میں دستیاب 500 پلاٹس سے کیا جائیگا، شہداء کے ورثاء کو پلاٹس دینے کا مقصد خاندانوں کی معاشی سپورٹ کرنا ہے۔
انہوں نے ہنگو، نوشہرہ، پشاور، سوات،ایبٹ آباد میں شہداء کے خاندانوں کو پلاٹس کی الاٹمنٹ جلد کرنے کی ہدایت کرتے ہوئے کہا کہ شہدا ء نے ہمارے محفوظ مستقبل کیلئے جو قربانیاں دیں ان کا بدلہ کسی صورت نہیں چکایا جاسکتا۔
