اسلام آباد: اسلام آباد ہائیکورٹ نے پی ٹی آئی انٹرنیشنل میڈیا کوارڈنیٹر احمد وقاص جنجوعہ کی ضمانت بعد از گرفتاری منظور کرلی۔
تفصیلات کے مطابق اسلا م آباد ہائیکورٹ میں جسٹس میاں گل حسن اورنگزیب اور جسٹس بابر ستار پر مشتمل ڈویژن بینچ نے پی ٹی آئی انٹرنیشنل میڈیا کوارڈنیٹر احمد وقاص جنجوعہ کی اسلحہ برآمدگی کیس میں ضمانت بعد از گرفتاری درخواست پر سماعت کی۔
احمد وقاص جنجوعہ کے وکیل نے دلائل دیتے ہوئے کہا کہ میرے موکل کو گھر سے اٹھا کر دو دن حبس بے جا میں رکھا گیا،عدالت میں کیس کیا تو کلاشنکوف برآمدگی مقدمے اور احمد وقاص بارے معلوم ہوا، رؤف حسن او ر دیگر کے ہمراہ ان کی گرفتاری بھی ڈالی گئی، رؤف حسن ضمانت پر رہا ہو چکے ہیں جبکہ سرکاری وکیل نے عدالت کو بتایا کہ احمد وقاص سے کلاشنکوف اور 300 گرام بارود برآمد کرنا ہے، درخواست ضمانت مسترد کی جائے۔
عدالت نے فریقین کے دلائل سننے کے بعد احمد وقاص جنجوعہ کی درخواست ضمانت بعد از گرفتاری منظور کرتے ہوئے رہائی کا حکم دے دیا۔
