اسلام آباد: امیر جماعت اسلامی حافظ نعیم الرحمن نے بارڈر پر سمگلنگ روکنے کیلئے آرمی چیف سے کردار ادا کرنے کا مطالبہ کرتے ہوئے کہا ہے کہ خطے میں جاری بے امنی روکنی ہوگی، عوام کو مایوس نہیں دیکھ سکتے، مطالبات کی منظوری کیلئے بہت آپشنز ہیں،عوام اخراجات پورے نہیں کر پا رہے، حکمرانوں کی شاہ خرچیاں جاری ہیں، ٹیکس نیٹ میں اضافے پر اعتراض نہیں مگر ریٹ بڑھنے سے ایکسپورٹر کمپٹیشن میں کیسے آئینگے؟، پاک ایران گیس پائپ لائن ہماری فوری ضرورت،کام ہوا تو گیس ضرورت پوری ہوجائے گی۔
تفصیلات کے مطابق اسلام آباد میں پریس کانفرنس کرتے ہوئے امیر جماعت اسلامی پاکستان حافظ نعیم الرحمن نے کہا کہ ہم 40 دن سڑکوں پر رہیں گے،ہم نہیں چاہتے عوام مایوس ہوں۔ انہوں نے کہا کہ حکومت سے مطالبات منظور کروانے کیلئے متعدد آپشنز موجود ہیں، یہ جماعت اسلامی کا نہیں بلکہ ملک کے 25 کروڑ عوام کا مسئلہ ہے، ہم تاجروں سے بھی مشاورت جاری رکھے ہوئے ہیں۔
انہوں نے کہا کہ بلوچستان اور خیبر پختونخوا میں امن و امان کی صورتحال بہت خراب ہے، پنجاب میں بھی امن و امان کی صورتحال اچھی نہیں،سندھ میں کچے کے ڈاکوؤں کا راج ہے۔ انہوں نے کہا کہ ملک میں 74 فیصد لوگ اپنے اخراجات پورے نہیں کر پارہے حکمرانوں کی شاہ خرچیاں جاری ہیں۔
انہوں نے کہاکہ نوجوان سوچنے پر مجبور ہیں کہ ملک میں ہمارے لئے مواقع نہیں ہیں،حکومت کو نوجوانوں کی نفسیات سمجھنی چاہئے، یہاں کوئی آگے نہیں بڑھ سکتا، کوئی مستقبل نہیں بنا سکتا۔ انہوں نے کہاکہ ایف بی آر میں کرپشن عروج پر ہے، 1300 ارب روپے کی کرپشن ہو رہی ہے۔
انہوں نے کہا کہ آمدن پر ٹیکس ہونا چاہئے، ٹیکس نیٹ میں اضافے پر کسی کو اعتراض نہیں، لیکن ریٹ بڑھایا جائے گا تو ایکسپورٹر کیسے کمپٹیشن میں آئیں گے؟۔ انہوں نے کہاکہ کوہاٹ میں گیس کی معقول ایکسپلوریشن ہوئی ہے، اگر حکمران بروقت درست اقدامات کرتے تو گیس کی لوڈشیڈنگ کا سامنا نہ ہوتا، گیس ایکسپلوریشن کا پراسیس تیز رفتاری سے جاری رکھنا چاہئے۔
انہوں نے کہا کہ پاک ایران گیس پائپ لائن ہماری فوری ضرورت ہے،ایران گیس پائپ لائن پر کام ہوا تو ہماری گیس کی ضرورت پوری ہوجائے گی۔ انہوں نے کہا کہ خطے میں جاری بے امنی کو روکنا ہوگا، پاکستان کو اچھے طریقے سے ہینڈل کرنا چاہئے۔
انہوں نے کہا کہ اسلام آباد کے بلدیاتی انتخابات کے معاملے میں تاخیر ی حربے استعمال کئے جا رہے ہیں، خیبرپختونخوا میں بلدیاتی اداروں کا بیڑہ غرق ہے، پی پی اور (ن) لیگ صرف پروموشن پر لگی ہوئی ہیں پنجاب میں بھی بلدیاتی انتخابات نہیں ہوئے، سندھ میں ہم نے لڑ لڑ کر بلدیاتی انتخابات کروائے مگر ان پر بھی شب خون مارا گیا ہے۔انہوں نے آرمی چیف سے مطالبہ کیا کہ وہ بارڈر پر سمگلنگ روکنے کیلئے کردار ادا کریں۔
