اسلام آباد: پاکستان اور امریکہ نے انسداد دہشت گردی و منشیات اور سیکیورٹی شعبوں میں تعاون بڑھانے پر اتفاق کرتے ہوئے اکتوبر میں باہمی اشتراک کے تحت لا انفورسٹمنٹ ڈائیلاگ کے انعقاد کا فیصلہ کیا ہے جبکہ وزیر داخلہ محسن نقوی نے کہا ہے کہ پاک امریکہ باہمی تعاون سے استفادے کیلئے اسلام آباد پولیس کا وفد جلد نیو یارک کا دورہ کرے گا، پاکستان، امریکا اور کینیڈا کی سہ ملکی سیریز اور امریکا و کینیڈا میں کرکٹ لیگ کے انعقاد پر کام جاری ہے۔
تفصیلات کے مطابق امریکی سفیر ڈونلڈ بلوم نے ہفتے کو وزارت داخلہ کا دورہ کیا جہاں وزیر داخلہ محسن نقوی نے ان کا خیر مقدم کیا۔ملاقات میں پاک امریکا تعلقات اور باہمی دلچسپی کے امور پر تبادلہ خیال ،انسداد دہشتگردی، انسداد منشیات اور سکیورٹی شعبوں میں تعاون بڑھانے پر اتفاق کیا گیا۔دونوں رہنماؤں نے باہمی اشتراک کے تحت اکتوبر میں لا انفورسمنٹ ڈائیلاگ کے انعقاد کا فیصلہ کیا۔
وزیر داخلہ نے کہا کہ قانون نافذ کرنے والے اداروں کی استعدادکار بڑھانے میں امریکی تعاون انتہائی اہمیت کا حامل ہے، باہمی تعلقات کو مزید مستحکم بنانے میں وزارت داخلہ بھر پور معاونت کرے گی۔انہوں نے بتایا کہ حالیہ دورہ نیویارک میں اسلام آباد پولیس اور نیویارک پولیس ڈیپارٹمنٹ کے درمیان تعاون بڑھانے پر بات چیت ہوئی ہے ،اسلام آباد پولیس کے افسران کو نیویارک پولیس ڈیپارٹمنٹ سے ٹریننگ کے خواہشمند ہیں، باہمی تعاون کے مواقع سے استفادہ کرنے کیلئے اسلام آباد پولیس کا وفد جلد نیویارک کا دورہ کرے گا۔
انہوں نے بتایا کہ پاکستان میں مقیم تمام اقلیتوں کو آئین پاکستان کے تحت مساوی حقوق حاصل ہیں، اقلیتوں کا تحفظ حکومت کی ذمہ داری ہے اور اس ضمن میں ہر ممکن اقدامات اٹھائے گئے ہیں، جڑانوالہ سانحہ کے تمام ملزمان کو گرفتار کر کے قانون کے سامنے پیش کیا گیا ہے۔
انہوں نے کہا کہ امریکہ میں ٹی 20ورلڈ کپ کا انعقاد کامیاب رہااس موقع پر بہترین انتظامات کئے گئے تھے۔ انہوں نے کہا کہ امریکہ عالمی کرکٹ کی نئی منزل بنا ہے، پاکستان، امریکا اور کینیڈا کی سہ ملکی سیریز اور امریکا و کینیڈا میں ایک کرکٹ لیگ کے انعقاد پر کام کر رہے ہیں۔اس موقع پر امریکی سفیر نے کہا کہ شائقین کی بڑی تعداد دلچسپ اور سنسنی خیز میچوں سے محظوظ ہوئی ہے ۔
