لاہور: وزیر اطلاعات پنجاب عظمیٰ بخاری نے 9مئی بارے مقدمات میں جوڈیشل کمیشن کے قیام کی مخالف کرتے ہوئے کہا ہے کہ یہ عدالتی ہتھوڑے سے ریلیف لینا چاہتے ہیں، 9 مئی کو ہر شہر میں فوجی تنصیبات یا کینٹ پر حملے اتفاق تھا؟،حافظ نعیم اگر سمجھتے ہیں تمام مسائل کا حل دھرنا ہے تو دے دیں، ثانیہ زہرہ قتل کیس میں کچھ لوگ طاقتور مگر بچ نہیں پائیں گے۔
تفصیلات کے مطابق چیئرپرسن سوشل پروٹیکشن اتھارٹی حنا پرویز بٹ کے ساتھ مشترکہ پریس کانفرنس کرتے ہوئے وزیر اطلاعات پنجاب عظمیٰ بخاری نے کہا کہ ثانیہ زہرہ قتل کیس میں ایک بچی کے قتل کو خود کشی کا رنگ دیا گیا، سسرال نے کہا گلے میں خود پھندا لیا، اب وہ زمانہ نہیں رہا کہ قتل کو خودکشی کا رنگ دیں گے تو پتا نہیں چلے گا، کیس میں خود کشی کے ثبوت نہیں ملے،گردن سوجی نہ لمبی ہوئی،پولی گرافک ٹیسٹ کیاگیاہے۔
انہوں نے کہا کہ پھندا میں استعمال دوپٹے میں ساس اور شوہر کے ڈی این اے ملے ہیں۔انہوں نے بتایا کہ ثانیہ زہرہ کا قتل پہلے ہی کردیا گیا تھا جسے بعد میں پھندا سے خود کشی قرار دینے کی کوشش کی گئی۔ انہوں نے کہا کہ ثانیہ زہرہ کیس میں کچھ لوگ طاقتور ہیں لیکن اب وہ زیادہ دیر تک بچ نہیں پائیں گے، اگر ہمارے دور حکومت میں ظلم ہوا تو ظالم کو سزا ملنی چاہئے۔
انہوں نے کہا کہ جماعت اسلامی کو تو اتنے ووٹ نہیں ملے جتنے دھرنے دے دیئے، حافظ نعیم الرحمٰن سمجھتے ہیں سارے مسائل کا حل دھرنا ہے تو دھرنا دے دیں۔ انہوں نے کہا کہ خیبرپختونخوا میں پل ٹوٹ رہے ہیں جبکہ حکمران جیل میں بیٹھے شخص کو خوش کررہے ہیں، جوڈیشل کمیشن بنوانے کا خیال ایک سال کے بعد کیوں آیا؟، کیا حسان نیازی عمران خان کا بھانجا نہیں، یاسمین راشد یا اعجاز چوہدری بیٹے کو نہیں بتا رہے تھے حملہ کرنا ہے؟، اتفاق تھا کہ ہر شہر میں ایک ہی جگہ پر حملے کئے گئے جو فوجی تنصیبات یا کینٹ تھے، تمام دفاتر کو جلایا گیا، اب بانی پی ٹی آئی کیسے مکریں گے؟۔
انہوں نے کہا کہ بانی پی ٹی آئی کہتے ہیں دوبارہ گرفتار کیا تو پھر ایسے ہی حملے ہوں گے۔ انہوں نے کہا کہ جوڈیشل کمیشن نہیں بننا چاہئے یہ عدالتی ہتھوڑے سے ریلیف لینا چاہتے ہیں،9 مئی کو جو ہوا سب کو یاد اور کیمرے میں محفوظ ہے۔انہوں نے کہا کہ مولانا فضل الرحمن ہمارے بزرگ ہیں، ان کے بیان پر سخت بیان نہیں دینا چاہتی، پاکستان میں جس کی حکومت ہے اس کے کام سامنے نظر آرہے ہیں۔
