کراچی: کنونیئر عوام پاکستان پارٹی شاہد خاقان عباسی نے کہا ہے کہ اب نئے الیکشن سے بھی معاملات حل نہیں ہونے والے، چیف جسٹس،آرمی چیف اور سیاستدان ملک چلانے بارے ملکر فیصلہ کریں، آئین پر چلنے والی ہر سیاسی جماعت کے ساتھ ہیں۔
احتساب عدالت کراچی کے باہر میڈیا سے گفتگو کرتے ہوئے سابق وزیراعظم شاہد خاقان عباسی نے کہا ہے کہ 4 سال سے زائد عرصے میں ہمارے خلاف صرف ایک گواہ کا بیان قلمبند کیا گیا، یہ ریفرنس کرپشن کیخلاف نہیں اختیارات کا غلط استعمال تھا، پہلے بھی عدالت یہ کہہ چکی ہے کہ ریفرنس غلط قائم کیا گیا تھا۔
انہوں نے کہا کہ چار سال ریفرنس کا چلنا ہمارے نظام کی مہربانی ہے، جتنی جلدی نیب کو ختم کیا جائے اتنا ملک کیلئے بہتر ہوگا۔ انہوں نے کہا کہ پولیٹیکل انجینئرنگ کیلئے ایسے کیسز شروع کئے جاتے ہیں، آج ہمارے لئے خوشی کا دن ہے کہ عدالت نے بری کردیا۔
انہوں نے کہا کہ ہمارے کیسوں میں بانی پی ٹی آئی نے کہا تھا کہ وکٹیں گرا رہا ہوں، بعد میں بانی پی ٹی آئی اور باجوہ نے ایک دوسرے پر کیس بنانے کا الزام لگایا۔ انہوں نے کہاکہ ملک میں اب نئے الیکشن سے بھی معاملات حل نہیں ہوں گے، چیف جسٹس، آرمی چیف اور سیاستدان ملکر بیٹھیں اور پہلے راستے کا تعین کریں کہ ملک کیسے چلے گا۔ایک سوال پر انہوں نے کہا کہ جو سیاسی جماعت آئین پر چلے گی ہم اس کے ساتھ ہیں، ہمارا کسی سے کوئی جھگڑا نہیں ہے۔
