اسلام آباد: صدر زرداری نے یوم آزادی پر قیدیوں کی سزاؤں میں 90 روز کی کمی کردی۔ تفصیلات کے مطابق صدر مملکت آصف زرداری نے آئین کے آرٹیکل 45 کے تحت یوم آزادی کے موقع پر معمولی سزاؤں میں ملوث قیدیوں کی سزاؤں میں 90 روز کی کمی کردی ہے۔
جاری اعلامئے کے مطابق سزاؤں میں کمی کا اطلاق قتل، جاسوسی،ریاست مخالف سرگرمیوں،زنا، چوری، ڈکیتی، اغواء، دہشت گردی، مالی جرائم اور قومی خزانے کو نقصان پہنچانے والے مجرموں پر نہیں ہوگا۔
سزا میں کمی کا اطلاق غیر ملکی افراد ایکٹ 1946ء اور منشیات کنٹرول (ترمیمی) ایکٹ 2022ء کے تحت سزا یافتہ افراد پر بھی نہیں ہو گا۔جاری بیان کے مطابق سزاؤں میں کمی کا اطلاق معمولی جرائم میں ملوث افراد، ایک تہائی قید کاٹ چکے 65 سال سے زائد عمر کے مرد قیدیوں پر ایک تہائی قید کاٹ چکی 60 سال سے زائد عمر کی خواتین قیدیوں،بچوں کے ساتھ جیل میں موجود خواتین اور ایک تہائی سزا کاٹ چکے 18 سال سے کم عمر افراد پر ہو گا۔
