لاہور: وزیراعلیٰ پنجاب مریم نواز نے کہا ہے کہ نوجوانوں کے ہاتھوں میں پتھر،پٹرول بم کی بجائے لیپ ٹاپ، کتابیں اور اعلیٰ ڈگریاں دیکھنا چاہتی ہوں،نوجوانوں کی توانائی اور صلاحیتیں ملک کی ترقی کیلئے بے حد اہم ہیں،کسی نوجوان کی تعلیم میں فیس کی کمی آڑے نہیں آئے گی،یقین ہے نوجوان محنت اور لگن سے پاکستان کو ایک ترقی یافتہ قوم بنائیں گے۔
تفصیلات کے مطابق نوجوانوں کے عالمی دن کے موقع پر اپنے بیان میں وزیراعلی پنجاب مریم نواز نے کہا کہ نوجوان قوم کا سرمایہ اور مستقبل کے معمار ہیں، یوتھ کی تعلیم و تربیت اور کردار سازی پر توجہ فرض ہے، لیگی حکومت نوجوانوں کو اپنے خوابوں کو حقیقت میں بدلنے کے مواقع دے رہی ہے۔
انہوں نے کہا کہ چیف منسٹر یوتھ انیشیٹیوز کے تحت نوجوان نسل کی فلاح و بہبود کیلئے متعدد پروگرام جاری ہیں، نوجوان طلبہ کی آسانی کیلئے ای اور پٹرول بائیکس کا دوسرا فیز جلد لائیں گے، نوجوانوں کو عالمی جاب مارکیٹ کے تقاضوں کے مطابق آئی ٹی سکلز ٹریننگ دی جا رہی ہیں۔
انہوں نے کہا کہ حکومت نوجوانوں کو پھر لیپ ٹاپ سکیم دے رہی ہے، جلد نوجوانوں کو اعلیٰ تعلیم کے وظائف دیئے جائیں گے، انشاء اللہ کسی نوجوان کی تعلیم میں فیس کی کمی آڑے نہیں آئے گی۔انہوں نے کہا کہ نوجوانوں کی توانائی اور صلاحیتیں ملک کی ترقی کیلئے بے حد اہم ہیں، یقین ہے نوجوان محنت اور لگن سے پاکستان کو ایک ترقی یافتہ قوم بنائیں گے۔
انہوں نے کہا کہ ارشد ندیم نوجوانوں کیلئے محنت سے کامیابی کے حوالے سے ایک درخشاں مثال ہے۔انہوں نے کہا کہ ملک کا نام روشن کرنیوالے نوجوانوں کو حکومت پنجاب ہر ممکن سہولت فراہم کرے گی۔انہوں نے کہا کہ نوجوانوں کے ہاتھوں میں پتھر اور پٹرول بم کی بجائے لیپ ٹاپ، کتابیں اور اعلیٰ ڈگریاں دیکھنا چاہتی ہوں۔
