اسلام آباد: وزیر اعظم شہباز شریف نے کہا ہے کہ نوجوان ملک کا روشن مستقبل تشکیل دینے والے کل کے رہنماء ہیں،تعلیم، کاروبار اور سماجی سرگرمیوں کیلئے ٹیکنالوجی کا استعمال کر کے نوجوان اپنے اندر مثبت تبدیلی کے محرک بن سکتے ہیں۔
تفصیلات کے مطابق وزیر اعظم شہباز شریف نے نوجوانوں کے عالمی دن کے موقع پر اپنے پیغام میں کہا ہے کہ نوجوان ملک کا روشن مستقبل تشکیل دینے والے کل کے رہنماء ہیں۔ انہوں نے با اختیار نوجوانوں کے انفرادی ترقی کیساتھ ملکی وسیع تر سماجی و اقتصادی ترقی میں کردار ادا کرنے کے باعث پاکستان روشن مستقبل کی طرف گامزن ہو گا۔ انہوں نے کہا کہ نوجوان تعلیم، کاروبار اور سماجی سرگرمیوں کیلئے ٹیکنالوجی کا استعمال کر کے اپنے اندر مثبت تبدیلی کے محرک بن سکتے ہیں۔
انہوں نے کہا کہ نوجوانوں کا عالمی دن منانے کا مقصد اس امر کا اعتراف کرنا ہے کہ نوجوان دنیا کے مستقبل کے معمار اور تبدیلی کا اصل محرک ہیں، اس سال نوجوانوں کے عالمی دن کا تھیم، ’کلکس سے ترقی تک، یوتھ ڈیجیٹل پاتھ ویز فار سسٹین ایبل ڈویلپمنٹ‘ ہے جو یہ واضح کرتا ہے کہ آج کے دور جہاں ٹیکنالوجی اور مواقع کا سنگم ہو رہا ہے میں نوجوانوں کی کس قدر اہمیت ہے۔
انہوں نے کہا کہ ٹیکنالوجی اور مواقع کا یہ ملاپ نوجوانوں کو اپنی خواہشات کو ٹھوس نتائج میں بدلنے کی طاقت فراہم کرتا ہے تاکہ وہ ایک پائیدار اور مساوی مستقبل کی راہ ہموار کر سکیں۔انہوں نے کہا کہ30 سال سے کم عمر کی 60 فیصد آبادی کیساتھ پاکستان بڑی نوجوان آبادی کا حامل ملک ہے جو تیزی سے عالمی ڈیجیٹل منظر نامے سے جڑ رہا ہے۔
انہوں نے کہا کہ تعلیم، کاروبار اور سماجی سرگرمیوں کیلئے ٹیکنالوجی کا استعمال کر کے نوجوان اپنے اندر مثبت تبدیلی کے محرک بن سکتے ہیں۔ انہوں نے کہا کہ آج کے دن ہم پاکستان کی نوجوان آبادی کی استعداد سے پوری طرح استفادہ کرنے اور ان کیلئے یکساں مواقع سے بھرپور سازگار ماحول پیدا کرنے کے اپنے عزم کا اعادہ کرتے ہیں۔
انہوں نے کہا کہ 2013 میں متعارف کرائی گئی یوتھ لون اینڈ ایگریکلچرل سکیم کے اب خاطر خواہ نتائج برآمد ہو رہے ہیں، آج تک ہم نے 2لاکھ 80ہزار سے زائد نوجوانوں میں کاروبار کیلئے تقریباً 186 ارب روپے تقسیم کئے ہیں جس سے ملک بھر میں روزگار کے بے شمار مواقع پیدا ہوئے ہیں۔
انہوں نے کہا کہ یوتھ بزنس لون سکیم کو ہماری حکومت کے دوران ری سٹرکچر کیا گیا تھا اور ہم نے مائیکرو فنانس اداروں کو بھی بلا سود قرضے فراہم کرنے کیلئے شامل کیا۔
