کابل: گزشتہ ایک سال کے دوران پاکستان ،ایران اور دیگر ممالک سے 17 لاکھ 79 ہزار603افغان مہاجرین اپنے وطن واپس پہنچ گئے۔
پناہ گزینوں اور وطن واپسی کی وزارت کے نائب مولوی عبد الرحمان نے ایک حکومتی تقریب میں کہا کہ یہ بات قابل ذکر ہے کہ اس وقت دوسرے ممالک میں 70 لاکھ افغان مہاجرین ہیں اور 30 لاکھ بے گھر افراد افغانستان کے اندر موجود ہیں۔
وزارت کی منصوبہ بندی اور پالیسی کے سربراہ مولوی محمود الحق احدی نے کہا کہ اس وقت ہمارے پاس تقریباً 29 صوبوں میں پناہ گزینوں کے لئے تقریباً 46 ٹاؤن شپس ہیں۔
احدی نے کہا کہ بین الاقوامی امدادی تنظیموں کے تعاون سے 7لاکھ 88 ہزارسے زیادہ افغانستان کے اندر بے گھر ہونے والےاور واپس آنے والے خاندانوں کو مذکورہ مدت کے دوران مالی، غذائی اجناس اور غیر غذائی اشیاء فراہم کی گئی ہیں۔
