اسلام آباد : صدر آصف زرداری نے کہا ہے کہ تیزی سے بڑھتی آبادی کے سماجی و اقتصادی ترقی پر اثرات کو سمجھنا ہوگا، نوجوانوں کی معیاری تعلیم، صحت اور روزگار کے مواقع تک رسائی بڑھانا ہوگی، سٹیک ہولڈرز بڑھتی آبادی کے چیلنجز سے نمٹنے میں تعاون کریں۔تفصیلات کے مطابق عالمی یوم آبادی کے موقع پر جاری پیغام میں صدر آصف زرداری نے کہا کہ پاکستان کو اپنی آبادی میں اضافے پر قابو پانے میں چیلنجز کا سامنا ہے،2023ء کی مردم شماری کے مطابق پاکستان کی آبادی 2.55فیصد کی بلند شرح سے بڑھ رہی ہے، ہماری آبادی 2030 تک 263ملین اور 2050 تک 383ملین تک پہنچنے کا تخمینہ ہے۔
انہوں نے کہا کہ ہماری آبادی کی اکثریت نوجوانوں پر مشتمل ہے، نوجوان متحرک قوت ہیں، وہ قوم کو خوشحالی کی طرف لے جانے کی بے پناہ صلاحیت رکھتے ہیں۔انہوں نے کہا کہ نوجوانوں کی معیاری تعلیم، صحت اور روزگار کے مواقع تک رسائی بڑھانا ہوگی۔انہوں نے کہا کہ آزادی کے وقت پانی کی فراوانی تھی،اب بڑھتی آبادی کے باعث پانی کی کمی کاسامنا ہے اور زرعی اراضی کو رہائشی علاقوں میں تبدیل کیا جا رہا ہے۔
انہوں نے کہا کہ تیزی سے بڑھتی آبادی کے سماجی و اقتصادی ترقی پر اثرات کو سمجھنا ہوگا، تمام سٹیک ہولڈرز بڑھتی آبادی کے چیلنجز سے نمٹنے میں تعاون کریں، خاندانی منصوبہ بندی کیلئے ڈیٹا کی دستیابی اہم ہے، ڈیٹا کی مدد سے باخبر فیصلہ سازی اور موثر پالیسی بنانا ممکن ہو گا۔
