لاہور: رہنماء پی ٹی آئی و سابق وزیر خارجہ شاہ محمود قریشی نے کہاہے کہ جمہوری و آئینی سوچ رکھنے والا غدار نہیں ہوسکتا، عمران خان سیاسی حقیقت ہیں، تسلیم کئے بغیر ملک میں استحکام نہیں آسکتا، 75 سال سے غداری کے سرٹیفکیٹ بانٹے جارہے ہیں، سلسلہ بند ہونا چاہئے۔
تفصیلات کے مطابق کوکوٹ لکھپت جیل لاہور میں 9 مئی واقعات بارے اپنے خلاف درج مقدمات میں درخواست ضمانت کی سماعت کے موقع پر صحافیوں سے غیر رسمی گفتگو کرتے ہوئے رہنماء پی ٹی آئی شاہ محمود قریشی نے کہا ہے کہ 40 سال سے سیاست کر رہا ہوں، میرے خلاف 39 سال تک کوئی مقدمہ درج نہیں ہوا لیکن اب ایک سال میں درجنوں مقدمات ہو گئے۔
انہوں نے کہا کہ کسی کو برا لگے یا اچھا لگے عمران خان ایک سیاسی حقیقت ہیں، ان کی سیاسی حقیقت تسلیم کئے بغیر ملک میں سیاسی استحکام نہیں آسکتا۔انہوں نے کہا کہ نواب اکبر بگٹی کے ساتھ جو ہوا ظلم تھا، اکبر بگٹی اینٹی پاکستان نہیں تھے، ایک دوسرے کو غدار، غدار کہنا بند ہونا چاہئے، 75 سالوں سے غداری کے سرٹیفکیٹ بانٹے جا رہے ہیں۔
انہوں نے کہا کہ محمود اچکزئی جمہوری سوچ رکھنے والے شخص ہیں، جمہوری اور آئینی سوچ رکھنے والا غدار نہیں ہوسکتا۔ انہوں نے کہا کہ بلوچستان میں امن کا راستہ مذاکرات سے ہو کر گزرتا ہے۔ ایک سوال پر انہوں نے کہا کہ پیرس اولمپکس میں گولڈ میڈل جیتنے پر ارشد ندیم کو مبارکباد پیش کرتا ہوں۔
