اسلام آباد: اسلام آباد ہائیکورٹ نے بشری بی بی کی نئے توشہ خانہ ریفرنس میں گرفتاری کیخلاف تحریری حکم نامہ جاری کردیا۔ تفصیلات کے مطابق اسلام آباد ہائیکورٹ کے جسٹس میاں گل حسن اورنگزیب اور جسٹس ارباب محمد طاہر پر مشتمل دو رکنی بینچ نے بانی پی ٹی آئی کی اہلیہ بشری بی بی کی نئے توشہ خانہ ریفرنس میں گرفتاری کیخلاف داخواست پر تحریری حکم نامہ جاری کردیا۔
تحریری حکم نامے میں کہا گیا ہے کہ نئے توشہ خانہ ریفرنس میں گرفتاری کیخلاف درخواست پر اعتراضات دور کئے جاتے ہیں، ریفرنس میں کال اپ نوٹسز کیخلاف دو درخواستیں پہلے سے زیر سماعت ہیں،اس درخواست میں نیب کی جانب سے متواتر گرفتاری کو چیلنج کیا گیا ہے، وکیل کے مطابق یہ درخواست اور دیگر 2 درخواستوں میں ایک جیسے حقائق و قانونی نکات زیر غور ہیں، عدالت متفق ہوتے ہوئے سمجھتی ہے کہ اس درخواست کو بھی دیگر 2 درخواستوں کے ساتھ سنا جائے، درخواستوں کی ایک ساتھ سماعت کیلئے رجسٹرار آفس درخواست کی فائل چیف جسٹس اسلام آباد ہائی کورٹ کو بھجوائے۔عدالت نے کہا کہ درخواست گزار وکیل کے مطابق گرفتاری کا معاملہ فوری حل کا متقاضی ہے، چیف جسٹس درخواستوں کو جلد سماعت کیلئے مقرر کر سکتے ہیں۔
