اسلام آباد: وفاقی وزیر داخلہ محسن نقوی نے وفاقی دارالحکومت کے تھانوں کی سمارٹ پولیس سٹیشن کی طرز پر اپ گریڈ یشن کا حکم دیتے ہوئے کہا ہے کہ پولیس بھرتیوں میں سمجھوتہ نہیں ہوگا، پولیس کی سائلین کیساتھ رویئے میں مثبت تبدیلی ضروری ہے، روایتی تھانے خوف کی علامت بن چکے ہیں، سائل آنے سے قبل کئی بار سوچتا ہے، اسلام آباد ملک کا چہرہ، عالمی معیار کا شہر بنانے کیلئے بلا تاخیر سمارٹ پولیسنگ کی طرف جانا ہوگا۔
تفصیلات کے مطابق وفاقی وزیر داخلہ محسن نقوی کی زیر صدارت اسلام آباد کے تھانوں کی اپ گریڈیشن پر پیشرفت بارے جائزہ اجلاس ہواجس میں وفاقی سیکرٹری داخلہ خرم علی آغا، چیئرمین سی ڈی اے محمد علی رندھاوا، ڈی آئی جی آپریشنز اور اعلیٰ حکام نے شرکت کی۔
وزیر داخلہ نے دارالحکومت کے تھانوں کو سمارٹ پولیس سٹیشن کی طرز پر اپ گریڈ کرنے کا حکم دیتے ہوئے کہا کہ روایتی تھانے خوف کی علامت بن چکے ہیں، سائل آنے سے پہلے کئی بار سوچتا ہے، خود بھی تھانوں کے دورے کرچکا ہوں، اس دوران جو حالت زار دیکھی وہ ناقابل بیان ہے۔
انہوں نے کہا کہ اسلام آباد پاکستان کا چہرہ ہے، اسے عالمی معیار کا شہر بنانے کیلئے بلاتاخیر سمارٹ پولیسنگ کی طرف جانا ہے، اسمارٹ پولیس سٹیشن کیلئے ہر ممکن وسائل فراہم کئے جائیں گے۔ انہوں نے کہا کہ خوش اخلاق و تعلیم یافتہ پولیس افسران کو سمارٹ پولیس سٹیشن میں تعینات کیا جائے گا، مرحلہ وار پروگرام کے تحت تھانوں کو اپ گریڈ کرکے سمارٹ پولیس اسٹیشن میں تبدیل کیا جائے گا۔
انہوں نے منصوبے پر جلد عملدرآمد کی ہدایت کرتے ہوئے کہا کہ اپ گریڈیشن کیلئے کم لاگت کے ساتھ معیاری ڈیزائن تیار کیا جائے۔
وزیر داخلہ نے دیگر عمارتوں میں قائم تھانوں کیلئے اراضی کی نشاندہی کی ہدایت کرتے ہوئے کہا کہ اسلام آباد پولیس میں بھرتیوں کیلئے میرٹ پر کوئی سمجھوتا نہیں ہوگا، ہر لحاظ سے فٹ، تعلیم یافتہ اور میرٹ پر پورا اترنے والے نوجوانوں کو بھرتی کیا جائے گا، پولیس کے سائلین کے ساتھ رویئے میں بھی مثبت تبدیلی ضروری ہے۔
