اسلام آباد: قومی اسمبلی میں اپوزیشن لیڈر عمر ایوب نے بجٹ کو دہشت گرد اور عوام پر ڈرون حملہ قرار دیتے ہوئے کہا ہے کہ وزارتوں کے خاتمے سے کیا ہوگا، بجٹ تو وہی رہے گا۔ تفصیلات کے مطابق قائمہ کمیٹی برائے خزانہ کے اجلاس کے بعد میڈیا سے گفتگو کرتے ہوئے قومی اسمبلی میں اپوزیشن لیڈر و رہنماء پی ٹی آئی عمر ایوب نے کہا کہ ترمیمی بل اتنی عجلت میں کیوں لایا گیا ہے، یہ 7 ترامیم لا رہے ہیں، ہمیں میٹنگ سے قبل مسودہ بھی نہیں دیا گیا اور آج فنانس کمیٹی اجلاس میں تین وفاقی وزرا آگئے، یہ وزراء اپنی کسی ایک قائمہ کمیٹی میں آجائیں تو بڑی بات ہوتی ہیں۔
انہوں نے کہا کہ میں نے ان سے پوچھا ہے کہ کن پٹی پر پستول 30بور کا تھا یا 9ایم ایم کا، یہ آئی ایم ایف کا دبا ؤہے اور کیا ہے، یہ دہشت گرد بجٹ ہے،پاکستانی عوام پر ڈرون حملہ ہوا ہے۔ انہوں نے کہا کہ یہ بورڈ آف ڈائریکٹرز سے ربر اسٹیمپ لگوائیں گے، مرضی کے فیصلے کرائیں گے۔ انہوں نے کہا کہ وزارتیں ختم کرنے سے کیا ہوگا کیا کوئی نفری میں تبدیلی آئے گی؟، صرف ڈیپارٹمنس ختم ہوں گے لیکن بجٹ تو وہی رہے گا۔
