اسلام آباد: الیکشن کمیشن نے اسلام آباد ہائیکورٹ کو وفاقی دارالحکومت میں بلدیاتی انتخابات 29 ستمبر کو کرانے کی یقین دہانی کرا دی۔ تفصیلات کے مطابق اسلام آباد ہائیکورٹ میں جسٹس محسن اختر کیانی نے اسلام آباد میں بلدیاتی انتخابات بارے کیس پر سماعت کی۔
الیکشن کمیشن حکام نے عدالت کو بتایا کہ انتخابات کیلئے الیکشن ایکٹ میں ترمیم ضروری ہے، مخصوص نشستوں سے متعلق معاملات بھی کلیئر نہیں ہیں، اگلے دو ہفتوں میں نوٹیفکیشن جاری کردیا جائیگا۔عدالت نے کہا کہ سماعت چھٹیوں کے بعد ہوگی، اگر کوئی مسئلہ ہوتا ہے تو سی ایم دائر کردی جائے۔عدالت کو بتایا گیا کہ ایم سی آئی کی آمدن اور اخراجات کی مکمل رپورٹ جمع کرادی گئی ہے۔
عدالت نے استفسار کیا کہ الیکشن کمیشن کا کیا اسٹیٹس ہے، الیکشن ایکٹ سے متعلق کوئی بل پراسیس میں ہے؟۔وکیل الیکشن کمیشن نے بتایا کہ جی ہاں الیکشن ایکٹ بل پراسیس میں ہے، کیبنٹ سے پاس ہوگیا ہے مگرابھی پارلیمنٹ میں پیش ہونا ہے جبکہ نشستوں سے متعلق معاملہ وزیر اعظم کو دوبارہ بھجوایا گیا ہے۔
وکیل الیکشن کمیشن نے کہا کہ ڈائریکٹ الیکشن ہوسکتا ہے لیکن نشستوں کا معاملہ حل ہونے تک ایم سی آئی کا نہیں ہوسکتا۔ جسٹس محسن اختر کیانی نے استفسار وفاقی حکومت کا کیا اسٹیٹس ہے، شیڈول کب دیں گے، الیکشن کمیشن کے وکیل نے بتایا کہ میٹنگ میں ایک ہفتہ کا وقت دیا تھا، کل دوبارہ یاد دہانی کروائی گئی ہے، اگست کے پہلے ہفتہ میں شیڈول دیں گے، عدالت نے استفسار کیا کہ کیا لوکل گورنمنٹ اسمبلی کے بغیر پراپرٹی ٹیکس معاملات ہوسکتے ہیں، اصل مسئلہ ترمیم کا ہے، وفاقی حکومت ہی معاملات کو دیکھے گی اس کے بعد معاملات ٹھیک ہوجائیں گے۔بعد ازاں الیکشن کمیشن کی جانب سے 29ستمبر کو اسلام آبادمیں بلدیاتی الیکشن کرانے کی یقین دہانی کے بعد کیس کی سماعت 15اکتوبر تک ملتوی کردی گئی۔
