اسلام آباد: پاکستان نے ایران کو شاہین میزائل دینے کی خبروں کی سختی سے تردید کرتے ہوئے کہا ہے کہ خطے میں قیام امن کیلئے کوششیں جا ری رکھیں گے، بنگلہ دیشی حالیہ واقعات میں پاکستان کے ملوث ہونے بارے رپورٹس بھارتی ذہنی خبط کی عکاسی کرتی ہیں،کانگریس میں پیش بھارت امریکا دفاعی تعاون بل پرتحفظات کا اظہار کیا ہے، امید ہے امریکی کانگریس پاکستان کیساتھ تعلقات بہتر بنانے میں کردار ادا کرے گی، آصف مرچنٹ معاملے پر امریکا کی جانب سے تفصیلات کا انتظار ہے۔
تفصیلات کے مطابق ہفتہ وار بریفنگ دیتے ہوئے ترجمان دفتر خارجہ ممتاز زہرا بلوچ نے بتایا کہ نائب وزیراعظم و وزیر خارجہ اسحاق ڈار نے فلسطین کی موجودہ صورتحال پر او آئی سی کے غیر معمولی اجلاس میں شرکت کی، جس میں انہوں نے فلسطین میں انسانی ہمدردی کی بنیاد پر امداد کو بلا تعطل جاری رکھنے پر زور دیا۔انہوں نے کہا کہ آسیان دن کے موقع پروزیر خارجہ نے پاکستان کی جانب سے مبارکباد دی، رواں ہفتے کے آغاز میں 5اگست کو 5 سال مکمل ہونے پر یوم استحصال کشمیر منایا گیااور اس عزم کا اعادہ کیا گیا کہ پاکستان اپنے کشمیری بھائیوں کی سفارتی و اخلاقی حمایت جاری رکھے گا۔
انہوں نے کہا کہ بھارتی میڈیا پاکستان کیخلاف پروپیگنڈا کر رہا ہے،پاکستان اقوام متحدہ کی سلامتی کو نسل قراردادوں کے مطابق مسئلہ کشمیر کا حل چاہتا ہے۔ انہوں نے بتایا کہ امریکا میں پاکستانی شہری آصف مرچنٹ کی جانب ڈونلڈ ٹرمپ پرحملے کے بارے امریکی حکام سے مسلسل رابطے میں ہیں، مسئلے پر امریکا کی جانب سے تفصیلات کا انتظار ہے۔
انہوں نے کہا کہ پاکستانی سفارتخانہ امریکا میں دیگر پاکستانی شہریوں کے حوالے سے بھی امریکی حکام سے رابطے میں ہے۔
انہوں نے کہا کہ کانگریس میں پیش کئے گئے بھارت امریکا دفاعی تعاون بل پرہم نے تحفظات کا اظہار کیا ہے، دوست ممالک کو اس میں نشانہ نہیں بنانا چاہئے، پاکستان امریکا کے ساتھ تعلقات کو اہمیت دیتا ہے، امید ہے کہ امریکی کانگریس پاکستان کے ساتھ تعلقات بہتر بنانے میں کردار ادا کرے گی۔ انہوں نے کہا کہ پاکستان اور بنگلا دیش کے عرصہ دراز سے مثبت تعلقات ہیں، پاکستان نے بنگلا دیش کی عبوری حکومت کے نئے چیف ایڈوائزر کو مبارکباد دی ہے اورپاکستانی ہائی کمشنر نے ان کی تقریب حلف برداری میں شرکت بھی کی ہے۔
انہوں نے کہا کہ پاکستان بنگلہ دیش کے حالیہ واقعات میں پاکستان کے ملوث ہونے کی تمام رپورٹس کو مسترد کرتا ہے ایسی رپورٹس بھارت کے ذہنی خبط کی عکاسی کرتی ہیں۔انہوں نے کہا کہ بنگلہ دیش میں ہمارے ہائی کمشنر پاکستانی طلبہ سے رابطے میں ہیں، 100 طالبعلم ابھی بھی بنگلہ دیش میں موجود ہیں، وہاں سلامتی کی صورتحال میں بہتری آرہی ہے۔
انہوں نے کہا کہ ایران اور اسرائیل کے درمیان تنازع کے بعد قائم مقام ایرانی وزیر خارجہ نے نائب وزیراعظم و وزیر خارجہ سے ٹیلیفونک رابطہ کیا، او آئی سی کے غیر معمولی اجلاس کے دوران پاکستان اور ایران کے قائم مقام وزیر خارجہ کے درمیان ملاقات ہو ئی۔
انہوں نے کہا کہ پاکستان کے ایران کو شاہین میزائل دینے کی خبروں میں کوئی صداقت نہیں ہے، پاکستان خطے میں قیام امن کیلئے اپنی کوششیں جا ری رکھے گا۔انہوں نے کہاکہ پوری قوم ارشد ندیم کو پاکستان کیلئے سونے کا تمغہ جیتے پر مبارکباد پیش کر تی ہے۔
