راولپنڈی: امام مسجد نبویؐ ڈاکٹر صلاح بن محمد البدیرنے کہا ہے کہ پاکستان عالم اسلام میں اہم مقام رکھتا،خطے میں امن واستحکام کیلئے کردار ادا کر رہا ہے۔ آئی ایس پی آر کی جانب سے جاری بیان کے مطابق امام مسجد نبویؐ ڈاکٹر صلاح بن محمد البدیرنے آرمی چیف جنرل سید عاصم منیرسے جنرل ہیڈ کوارٹرز میں ملاقات کی جس میں باہمی دلچسپی کے امور پر تبادلہ خیال کیا گیا۔ آئی ایس پی آر کے مطابق ملاقات میں باہمی دلچسپی کے امور پر تبادلہ خیال کیا گیا۔
چیف آف آرمی سٹاف نے معزز مہمان کو خوش آمدید کہا اور اس بات پر زور دیا کہ امام مسجد نبویؐ کا پاکستان کا دورہ پاکستانی عوام کیلئے باعث فخر ہے۔
اس موقع امام مسجد نبویؐ نے کہا کہ پاکستان عالم اسلام میں اہم مقام رکھتا ہے اور خطے میں امن اور استحکام کیلئے اپنا اہم کردار ادا کر رہا ہے۔ دونوں فریقین نے پاک سعودی تعلقات پر اطمینان کا اظہار کیا،آخر میں امام مسجد نبویؐ نے مسلم اْمہ کے امن،استحکام اور اتحاد کیلئے دعاء کی۔
