اسلام آباد: نائب وزیراعظم و وزیر خارجہ اسحاق ڈار نے کہا ہے کہ طاقت کے مقابلے نے بلاک سیاست کا خدشہ بڑھا دیا ہے،ہمیں خود کو روایتی سفارتکاری سے اقتصادی سفارت کاری کی طرف موڑنا ہوگا،اپنی صلاحیت کے مطابق ملک کی خدمت سفارتکاروں پر فرض ہے،ہر نئی سیاسی یا انتظامی ذمہ داری سفارت کار کو چیلنج کرے گی۔
تفصیلات کے مطابق اسلام آباد میں 43ویں ڈپلومیٹک کورس گریجویشن کی تقریب سے خطاب کرتے ہوئے نائب وزیر اعظم و وزیر خارجہ اسحاق ڈار نے کہا کہ سفارتی کورس مکمل کرنیوالے طلبہ اور والدین کو مبارکباد پیش کرتا ہوں، سفارتی خدمات میں شامل ہونے پر طلباء کو اپنی ذمہ داریوں سے نبرآزما ہونا ہو گا۔
انہوں نے کہا کہ فارن سروس اکیڈمی نے 1500سے زائد غیر ملکی سفارت کاروں کو تربیت دی، فارن سروس اکیڈمی نے ایسے ممتاز سفارتکار پیدا کئے جنہوں نے پاکستان کی نمائندگی بڑے اعزاز کے ساتھ کی۔ انہوں نے کہا کہ ملک کے نمائندے کی حیثیت سے پاکستانیوں کی فلاح وبہبود کا خیال رکھنا اولین فرض ہے۔
انہوں نے کہاکہ دنیا اور پاکستان ایک گہری تبدیلی سے گزررہے ہیں، غزہ میں اسرائیل کے مظالم جاری ہیں، نئے غیر یقینی چیلنجز نے سکیورٹی کو مزید غیر مستحکم کردیا ہے۔
انہوں نے کہا کہ طاقت کے مقابلے نے بلاک کی سیاست کا خدشہ بڑھا دیا ہے، سفارتکاروں پر فرض ہے کہ اپنی صلاحیتوں کے مطابق پاکستان کی خدمت کریں، ہر نئی ذمہ داری، چاہے سیاسی ہو یا انتظامی آپ کو چیلنج کرے گی۔
انہوں نے کہا کہ بلاک سیاست عالمی سیاست،معیشت اوربین الریاستی تعلقات کو بری طرح متاثر کریگی، پوری دنیا کے معاشرے دباؤ کا شکار ہیں، دائیں بازو کی سیاست کا عروج واضح ہے، سافٹ پاور نے روایتی جنگ کی جگہ لے لی،اب بیانیہ اورغلط معلومات کی جنگ ہو رہی ہے۔
انہوں نے کہا کہ عالمی تبدیلیاں پاکستان کے عالمی تعلقات اور خارجہ پالیسی پر براہ راست اثر انداز ہورہی ہیں، خودمختاری،علاقائی سالمیت اور آزادی کیلئے چیلنجز کا جواب دینا چاہئے،ہمیں خود کو روایتی سفارتکاری سے اقتصادی سفارت کاری کی طرف موڑنا ہوگا۔
انہوں نے کہا کہ پاکستان کا ترقیاتی ایجنڈا آگے بڑھانے کیلئے ہمیں مل کر کردارادا کرنا ہوگا، نوجوان سفارتکاروں کو تجارت اور سرمایہ کاری سمیت ضروری مہارتوں سے لیس کیا جائے، انہوں نے کہا کہ سفارتکاروں کو عالمی قانون اورسیاست کے ساتھ اقتصادی سفارتکاری کا بھی ماہر ہونا چاہئے۔
