پشاور: مشیر اطلاعات خیبرپختونخوا بیرسٹر سیف نے کہا ہے کہ الیکشن ایکٹ میں ترامیم کر کے آئین کی روح، متن کی توہین، بے عزتی کی گئی، قانون کا اثر ہر انتخاب پر پڑے گا، حکمران ملک وقوم سے مخلص نہیں، لوٹی دولت کیلئے کبھی ایسی قانون سازی نہیں کی گئی۔
تفصیلات کے مطابق پشاور میں پریس کانفرنس کرتے ہوئے مشیر اطلاعات خیبرپختونخوا بیرسٹر سیف نے کہا کہ موجودہ حکمران ذاتی مفاد کیلئے لاکھوں لوگوں کے حقوق پر قابض ہیں، الیکشن ایکٹ میں ترمیم کر کے آئین کی روح اور متن کی توہین اور بے عزتی کی گئی۔انہوں نے کہا کہ قانون سازی کا ایک طریقہ کار ہے جو عوام کی امنگوں کے مطابق ہوتا ہے، الیکشن کو چوری کیا گیا ہے، الیکشن ایکٹ کو اسمبلی اور سینیٹ سے پاس کیا گیا ہے، یہ عام قانون نہیں بلکہ وہ قانون ہے جس کا اثر پاکستان کے ہر انتخاب پر پڑے گا۔
انہوں نے کہا کہ جو کچھ کیا گیا اس سے لاکھوں لوگ ووٹ کے حق سے محروم ہوئے، یہ ایک کالا قانون ہے، مخصوص نشستیں پی ٹی آئی کو نہ دینے کیلئے الیکشن ایکٹ پاس کیا گیا ہے، یہ لوگ پاکستان اور عوام سے مخلص نہیں ہیں، پاکستان کے عوام اور لوٹی ہوئی رقم کیلئے تو انہوں نے کبھی ایسی قانون سازی نہیں کی۔انہوں نے کہا کہ ارشد ندیم نے دنیا بھر میں پاکستان کا سر فخر سے بلند کر دیا ہے، پاکستانی نوجوانوں میں بے پناہ ٹیلنٹ ہے، مگر لاکھوں نوجوانوں کو اپنی صلاحیتوں کے اظہار کا موقع ہی نہیں مل رہا۔
