برازیلیا: برازیل نے جراتمندانہ اقدام اٹھاتے ہوئے فلسطین کیساتھ آزادانہ تجارتی معاہدے کی منظوری دیتے ہوئے کہا ہے کہ معاہدہ فلسطینی ریاست کو اقتصادی طور پر مضبوط کرنے کیلئے ٹھوس قدم ہے۔ غیر ملکی میڈیا کے مطابق برازیل نے فلسطینی عوام سے اظہار یکجہتی کرتے ہوئے 13 سال بعدفلسطینی اتھارٹی کیساتھ آزاد تجارتی معاہدے کی منظوری دے دی ہے۔
میڈیا رپورٹ کے مطابق 2011ء میں جنوبی امریکہ کے تجارتی بلاک مرکوسور اور فلسطینی اتھارٹی کے درمیان آزاد تجارتی معاہدہ طے پایا تھا مگر تاحال اس پر عملدرآمد موخر تھا۔ برازیلی وزارت خارجہ نے معاہدے کو نافذ کرتے ہوئے بیان میں کہا کہ یہ معاہدہ فلسطینی ریاست کو اقتصادی طور پر مضبوط کرنے کیلئے ٹھوس قدم ہے، یہ ریاست ایسی ہوگی جو پڑوسیوں کیساتھ پرامن اور ہم آہنگی سے قائم رہ سکے گی۔
دوسری جانب برازیلیا میں فلسطینی سفیر ابراہیم ال زیبن نے فیصلے کو جرات مندانہ، مددگار اور بروقت قرار دیتے ہوئے کہا کہ یہ فلسطین میں امن کی حمایت کا موثر طریقہ ہے جس سے مرکوسور ممالک کیساتھ فلسطینی تجارت میں اضافہ ہوگا جس کا موجودہ حجم سالانہ 32ملین ڈالر ہے۔واضح رہے کہ مرکوسور جنوبی امریکی تجارتی بلاک ہے جس میں ارجنٹائن، برازیل، پیراگوئے اور یوراگوئے شامل ہیں۔
