اسلام آباد: وزیر اعظم شہباز شریف نے مطالبہ کیا ہے کہ متعدد چیلنجز کے باوجود چار دہائیوں تک افغان مہاجرین کی عزت ،وقار کیساتھ میزبانی کی ،عالمی برادری افغان مہاجرین کی وطن واپسی کے مسئلے میں مدد کرے،پاکستان کو درپیش سماجی و اقتصادی چیلنجز اور سلامتی خطرات کو مد نظر رکھا جائے۔
تفصیلات کے مطابق وزیراعظم شہباز شریف سے اقوام متحدہ کے ہائی کمشنر برائے مہاجرین فلپو گرینڈی نے وزیر اعظم ہاؤس میں ملاقات کی جس میں افغان مہاجرین کی وطن واپسی بارے امور پر تبادلہ خیال کیا گیا ۔وزیراعظم نے کہا کہ پاکستان نے متعدد چیلنجز کے باوجود چار دہائیوں تک افغان مہاجرین کی انتہائی عزت اور وقار کے ساتھ میزبانی کی ہے۔
انہوں نے کہا کہ افغان مہاجرین کی محفوظ اور باوقار وطن واپسی حکومت پاکستان کی اولین ترجیحات میں شامل ہے،افغان مہاجرین کی وطن واپسی کے مسئلے میں عالمی برادری مدد کرے اور اس بارے پاکستان کو درپیش سماجی و اقتصادی چیلنجز اور سلامتی خطرات کو مد نظر رکھا جائے۔ انہوں نے کہا کہ یو این ایچ سی آر کو افغان مہاجرین کیلئے پائیدار حل کو فروغ دینے میں کردار ادا کرنا چاہئے۔
اس موقع پر اقوام متحدہ کے ہائی کمشنر نے کئی دہائیوں سے لاکھوں افغان مہاجرین کی میزبانی پر حکومت پاکستان کوخراج تحسین پیش کیا۔ہائی کمشنر فلپو گرینڈی نے کہا کہ کمیشن افغان مہاجرین کی بنیادی ضروریات کو پورا کرنے کیلئے پاکستان کے ساتھ مل کر کام کرتا رہے گا۔
