لاہور: لاہور ہائیکورٹ نے وقار یونس کی بطور ایڈوائزر چیئرمین پی سی بی تقرری کیخلا ف دائر درخواست پر سماعت عدالتی تعطیلات کے بعد تک ملتوی کرتے ہوئے درخواست گزار کو تقرری کا نوٹیفکیشن درخواست کیساتھ لگانے کی ہدایت کردی۔
تفصیلات کے مطابق لاہور ہائیکورٹ میں جسٹس شہرام سرور چودھری نے وقار یونس کی بطور ایڈوائزر چیئرمین پی سی بی تقرری کیخلاف شہری مشکور حسین کی درخواست پر سماعت کی۔ درخواست گزار کی جانب سے ندیم سرور ایڈووکیٹ عدالت میں پیش ہوئے۔
عدالت نے درخواست گزار کے وکیل سے استفسار کیا کہ کرکٹ قوانین کیا کہتے ہیں؟،آپ کس طرح متاثرہ فریق ہیں؟ جس پر وکیل نے جواب دیا کہ میں پاکستان کا شہری ہوں، اشتہار کے بغیر تقرری کا نوٹیفکیشن جاری کیا گیا۔
بعد ازاں عدالت نے درخواست گزار کو تقرری کا نوٹیفکیشن درخواست کے ساتھ لگانے کی ہدایت جاری کرتے ہوئے سماعت عدالتی تعطیلات کے بعد تک ملتوی کردی۔
