اسلام آباد: پاکستان اور عراق نے ہوائی سفر سے اربعین جانیوالے پاکستانی زائرین سے داخلے پر پاسپورٹ نہ لینے کا فیصلہ کیا ہے۔
تفصیلات کے مطابق وفاقی وزیر داخلہ محسن نقوی سے عراق کے سفیر حامد عباس نے ملاقات کی جس میں اربعین کے موقع پر زائرین کی سہولت کیلئے سپیشل پروازیں اور ڈپلومیٹک و آفیشل پاسپورٹ پر ویزا چھوٹ کے معاہدے کو جلد حتمی شکل دینے پر اتفاق کیا گیا۔
ملاقات میں فیصلہ کیا گیا کہ ہوائی سفر سے عراق جانیوالے پاکستانی زائرین سے داخلے پر پاسپورٹ نہیں لئے جائیں گے، اربعین کے موقع پر عراقی سفارتخانہ زائرین کو ویزے جاری کرے گا۔ملاقات میں کراچی میں عراقی قونصلیٹ دوبارہ کھولنے، عراق میں قید پاکستانیوں کی وطن واپسی پر بھی تبادلہ خیال کیا گیا۔
اس موقع پر گفتگو کرتے ہوئے وزیر داخلہ محسن نقوی نے کہا کہ عراق میں پولیس لائنزن افسر تعینات کیا جائے گا اور زائرین سے زائد فیس چارج کرنے والے ایجنٹوں کے خلاف ایکشن لیا جائے گا۔
