اسلام آباد: وزیراعظم شہباز شریف نے رواں مون سون سیزن میں ملک بھر میں 10 کروڑ درخت لگانے کا اعلان کرتے ہوئے کہا ہے کہ اقدام سے ملکی خوبصورتی میں اضافہ، موسمی تبدیلی کنٹرول کرنے میں مدد ملی گی، امید ہے شجر کاری مہم میں ہر کوئی بڑھ چڑھ کر اپنا حصہ ڈالے گا۔
تفصیلات کے مطابق وزیراعظم شہباز شریف نے وزیراعظم ہاؤس کے سبزہ زار میں پودا لگا کر مون سون شجر کاری مہم 2024ء کا افتتاح کردیا۔ اس موقع پر بریفنگ دیتے ہوئے وزیراعظم کو بتایا گیا کہ شجرکاری مہم کے دوران ملک بھر میں 3 ارب 20 کروڑ پودے لگانے کا ہدف ہے۔
تقریب سے خطاب کرتے ہوئے وزیراعظم شہباز شریف نے کہا کہ میں نے متعلقہ محکموں کو ہدایت دی ہیں کہ رواں سیزن میں ملک بھر میں کم سے کم 10 کروڑ پودے لگائیں جائیں، درختوں سے آب و ہوا اور قدرتی حسن میں اضافہ ہوگا۔
انہوں نے کہا کہ درخت لگانے سے نہ صرف پاکستان مزید خوبصورت ہوگا بلکہ موسمی تبدیلی کے باعث جیسے 2022ء میں پاکستان بری طرح متاثر ہو ا تھااسے بھی کنٹرول کرنے میں مدد ملی گی اور فضائی آلودگی میں فرق پڑے گا۔
انہوں نے کہا کہ مون سون موسم ہر لحاظ سے حسین مزاج موسم ہے، اس سے گرمی کی شدت میں کمی آتی ہے اور ہر طرف مسکراہٹیں بکھرتی ہیں، اللہ تعالیٰ نے پاکستان کو بے پناہ نعمتوں سے نوازا ہے، اب یہ ہم پر ہے کہ ہم شبانہ روز محنت کرکے ان نعمتوں سے فائدہ اٹھائیں اور اللہ کے حضور شکر کا سجدا ادا کریں۔
انہوں نے کہا کہ آج مون سون موسم میں شجرکاری کے آغاز پر سب لوگوں کو مبارکباد پیش کرتا ہوں اور امید کرتا ہوں کہ پورے پاکستان میں صوبائی حکومتوں کے ساتھ مل کر وفاقی حکومت، محکمے، افسران اور افراد اس عظیم کام میں اپنا بھرپور کردار ادا کریں گے۔
انہوں نے کہا کہ مجھے امید ہے کہ ملک کو آلودگی سے بچانے اور اسے خوبصورت بنانے کیلئے سب اپنا کردار ادا کریں گے، یہاں موجود بچے بھی اس بات کی گواہی دے رہے ہیں کہ یہ پاکستان کے تابناک مستقبل کی ضمانت ہیں، یہ بڑے ہوکر تعلیم حاصل کرکے پاکستان کے عظیم معمار بنیں گے۔
