اسلام آباد: وفاقی وزیر منصوبہ بندی احسن اقبال نے کہا ہے کہ ڈیجیٹلائزیشن کا فروغ ترقی اور شفافیت کیلئے ناگزیر ہے، حکومت ڈیجیٹل پاکستان کیلئے پرعزم ہے، شہریوں، کاروباری اور سرکاری اداروں کے تحفظ کیلئے سائبر سکیورٹی شعبے کو مضبوط کررہے ہیں، ٹیکنالوجی کے فروغ کیلئے حکومت و نجی شعبے کو سرمایہ کاری ایس ایم ایز کی حوصلہ افزائی،نوجوانوں کی 65 فیصد آباد کو جدید ہنر سے آراستہ کرنے کی ضرورت ہے۔
تفصیلات کے مطابق جی ایس ایم اے کے زیر اہتمام ڈیجیٹل نیشن پاکستان پروگرام کی افتتاحی تقریب سے خطاب کرتے ہوئے وفاقی وزیر منصوبہ بندی احسن اقبال نے کہا کہ پاکستان میں نئے ڈیجیٹل دور کا آغاز ہورہا ہے، ڈیجیٹلائزیشن کا فروغ ترقی اور شفافیت کیلئے ناگزیر ہے، حکومت ڈیجیٹل پاکستان کیلئے پرعزم ہے۔
انہوں نے کہا کہ ڈیجیٹل پاکستان میں لوگوں کیلئے ترقی کے نئے مواقع ہوں گے، ہمیں شفافیت، بہتر طرز حکمرانی اور معاشی ترقی کیلئے ڈیجیٹل ٹیکنالوجی کو اپنانا ہوگا۔ انہوں نے کہا کہ تعلیمی اداروں اور ٹیک انڈسٹری کے درمیان تعاون کو فروغ دینا وقت کی اہم ضرورت،حکومت نوجوانوں میں پیشہ وارانہ اور ڈیجیٹل مہارتوں کو فروغ دینے کیلئے اقدامات کر رہی ہے۔انہوں نے کہا کہ پاکستان میں غریب نوجوانوں کو ایک ملین لیپ ٹاپ فراہم کئے گئے ہیں۔
انہوں نے کہا کہ حکومت شہریوں، کاروباری اور سرکاری اداروں کے تحفظ کیلئے سائبر سکیورٹی کے شعبے کو مضبوط کر رہی ہے، دیہی علاقوں میں ڈیجیٹلائزیشن کے فروغ اور سستے انٹرنیٹ کی فراہمی کو یقینی بنانے کیلئے اقدامات کر رہے ہیں۔
انہوں نے کہا کہ ٹیکنالوجی کے فروغ کیلئے حکومت و نجی شعبے کو سرمایہ کاری،سٹارٹ اپس اور ایس ایم ایز کی حوصلہ افزائی اور نوجوانوں کی 65 فیصد آباد کو جدید ہنر سے آراستہ کرنے کی ضرورت ہے۔ انہوں نے کہا کہ ماہرین جدت پر مبنی آئیڈیاز پیش کریں، حکومت اس پر خصوصی توجہ دے گی۔
