لاہور: گورنر پنجاب سردار سلیم حیدر نے کہا ہے کہ چینی سرمایہ کاروں کو پنجاب میں سرمایہ کاری کیلئے ہر ممکن تعاون فراہم کیا جائے گا، چینی قونصل جنرل کی جانب سے فراہم رقم سے اٹک میں غریب لوگوں کو علاج معالجہ کی فراہمی کیلئے ڈسپنسری قائم کی جائے گی۔
تفصیلات کے مطابق گورنر پنجاب سردار سلیم حیدر خان نے بدھ کو چینی قونصلیٹ کا دورہ کیا اور چینی قونصل جنرل ژاؤ شیریں سے ملاقات کی، دونوں رہنماؤں نے پاکستان اور چائنہ کے درمیان تعاون اور دوستی مزید مضبوط کرنے کے عزم کا اظہار کیا۔اس موقع پر گفتگو کرتے ہوئے گورنر پنجاب سردار سلیم حیدر خان نے کہا کہ پاکستان اور چین کے درمیان غیر متزلزل دوستی کی طویل تاریخ اور محبت اور اعتماد کا گہرا رشتہ ہے۔
انہوں نے کہا کہ یہ بے مثال دوستی آنیوالی نسلوں میں اسی طرح بلکہ اس سے بھی زیادہ مضبوطی سے منتقل ہو رہی ہے۔
انہوں نے کہا کہ پاک چین دوستی کیلئے مل کر مثبت کردار ادا کرتے رہیں گے، چینی سرمایہ کاروں کو پنجاب میں سرمایہ کاری کیلئے ہر ممکن تعاون فراہم کیا جائے گا۔اس موقع پر چینی قونصل جنرل نے گورنر پنجاب کو اٹک میں ترقیاتی کاموں کیلئے 40 لاکھ روپے کا چیک دیا،رقم کا اعلان چینی قونصل جنرل نے سلیم حیدر سے گورنر ہاؤس میں ملاقات کے دوران کیا تھا۔
گورنرسلیم حیدر نے چینی قونصل جنرل کے خیر سگالی جذبے کا شکریہ ادا کرتے ہوئے کہا کہ رقم سے کمیونٹی کے تعاون سے اٹک میں ایک ڈسپنسری قائم کی جائے گی جس سے علاقے کے غریب لوگوں کیلئے علاج معالجہ کی بہت بڑی سہولت پیدا ہو گی۔
