اسلام آباد: وفاقی حکومت نے اسلام آباد میں عالمی معیار کا پہلا چڑیا گھر اور سفاری پارک بنانے کی منظوری دے دی۔ تفصیلات کے مطابق وفاقی وزیر داخلہ محسن نقوی کی زیر صدارت سی ڈی اے ہیڈکوارٹر میں اجلاس کا انعقاد ہوا جس میں اسلام آباد کے شہریوں کو عالمی معیار کی تفریحی سہولتوں کی فراہمی کے منصوبے پر تبادلہ خیال کیا گیا۔
جاری اعلامئے کے مطابق چیئرمین سی ڈی اے نے وزیر داخلہ کو چڑیا گھر اور سفاری پارک کے قیام کے پراجیکٹ پر بریفنگ دی جس پر محسن نقوی نے چڑیا گھر اور سفاری پارک پراجیکٹ کی اصولی منظوری دے دی۔اعلامئے کے مطابق 200 ایکڑ پر چڑیا گھر اور سفاری پارک میں 5 ہزار جانور اور پرندے رکھے جائیں گے۔
اجلاس میں گفتگو کرتے ہوئے وزیر داخلہ نے سفاری پارک کی ورلڈ ایسوسی ایشن آف زو اینڈ ایکوریم سے رجسٹریشن کروانے کی ہدایت کرتے ہوئے کہا کہ اکتوبر میں چڑیا گھر اور سفاری پارک کا سنگ بنیاد رکھا جائے گا۔ انہوں نے کہا کہ چڑیا گھر اور سفاری پارک سے اسلام آباد کی سیاحت میں اضافہ ہو گا۔
