لاہور: قومی اسمبلی میں اپوزیشن لیڈر عمر ایوب نے کہا ہے کہ الیکشن ترمیمی ایکٹ پی ٹی آئی کا راستہ روکنے کی بھونڈی کوشش ہے، جتنی مرضی کوششیں کی جائیں یہ کامیاب نہیں ہوں گے، قانون کیخلاف عدالت جائینگے، امید ہے ریلیف ملے گا،حکمران کدھر بھاگیں گے؟، حسینہ واجد تو بھارت چلی گئیں ادھر سے ہیلی کاپٹر نہیں جائے گا۔
تفصیلات کے مطابق اے ٹی سی لاہور کے باہر میڈیا سے گفتگوکرتے ہوئے قومی اسمبلی میں اپوزیشن لیڈر عمر ایوب نے کہا کہ الیکشن ترمیمی ایکٹ پی ٹی آئی کا راستہ روکنے کی بھونڈی کوشش ہے،حکومت کسی بھی طرح سے پی ٹی آئی کا راستہ نہیں روک سکتی۔
انہوں نے کہا کہ میں کہتا ہوں روک سکتے ہو تو روک لو، یہ لوگ جتنی بھی کوشش کر لیں، کامیاب نہیں ہوں گے، ہماری سیٹیں ہمیں ملیں گی، وہ سیٹیں ہمیں آئین اور قانون دے گا۔ انہوں نے کہاکہ جو ایکٹ پاس کیا گیا ہے وہ مکمل غلط اور منفی ہے،قانون اور آئین کے منافی ایکٹ کو ہر جگہ چیلنج کریں گے، ہم لوگ الیکشن ترامیم کیخلاف عدالتوں میں جائیں گے، امید ہے ہمیں ریلیف ملے گا۔
انہوں نے کہا کہ ملک میں 500 ارب کا پیٹرول سمگل ہوتا ہے، سمگلنگ میں حکومتی لوگ ملوث ہیں، کراچی، بلوچستان اور پنجاب کے حالات سب کے سامنے ہیں، اس حکومت کے ہاتھ میں کچھ نہیں ہے۔ انہوں نے کہا کہ گوادر میں ماہ رنگ کا احتجاج بالکل درست ہے، خدارا آپ پختون لوگوں کی آواز سنیں، ملک کے اقتصادی حالات بہت سنجیدہ ہیں۔
انہوں نے کہا کہ صوابی کا جلسہ سب نے دیکھا ہے، ہمارے کسی کے ساتھ کوئی مذاکرات نہیں ہو رہے، ملک میں تازہ الیکشن ہمارا واحد مطالبہ ہے، ہمارا چرایا ہوا مینڈیٹ واپس کیا جائے، الیکشن کسی بھی وقت ہو سکتا ہے، پاکستان نئے الیکشن کی طاقت رکھتا ہے۔
انہوں نے کہا کہ فنانس کا ایک طالب علم ہوتے بتا سکتا ہوں یہ بجٹ عوام دشمن ہے، اس سے مہنگائی مزید بڑھے گی، شہباز شریف، مریم نواز یہ سب لوگ کدھر بھاگیں گے؟ حسینہ واجد تو بھارت چلی گئی تھیں لیکن ادھر سے ہیلی کاپٹر نہیں جائے گا۔
