اسلام آباد: چیئرمین پی ٹی آئی بیرسٹر گوہر نے رکن قومی اسمبلی شیر افضل مروت کو بانی عمران خان سے ملاقات کی دعوت دیتے ہوئے کہاہے کہ شیر افضل مروت ہمارے ساتھ ہیں اور رہیں گے، دو دن صبر کر یں اچھی خبر مل جائیگی، یہاں آئینی ترامیم بدل جاتی ہیں یہ تو پھر نوٹیفکیشن ہے۔
تفصیلات کے مطابق رکن قومی اسمبلی شیر افضل مروت کے ہمراہ پارلیمنٹ ہاؤس کے باہر صحافیوں سے گفتگو کرتے ہوئے چیئرمین پی ٹی آئی بیرسٹر گوہر نے کہا کہ شیر افضل مروت کی بنیادی رکنیت کا نوٹیفکیشن جاری ہونا غلط فہمی ہے،انہیں بانی پی ٹی آئی سے ملاقات کی دعوت دی ہے، میں تو کہتا ہوں ابھی چلیں اور ملاقات کر لیں۔
انہوں نے کہا کہ یہ ہمارا پارٹی کا اندرونی معاملہ ہے،شیر افضل مروت ہمارے ساتھ تھے اور رہیں گے، دو دن صبر کر جائیں آپ کو اچھی خبر ملے گی، یہاں تو آئینی ترامیم بدل جاتی ہیں یہ تو پھر ایک نوٹیفکیشن ہے۔اس موقع پر شیر افضل مروت نے کہا کہ مجھے بیرسٹر گوہر اور بانی پی ٹی آئی پر پورا بھروسہ ہے۔
