پشاور: خیبر پختونخوا حکومت نے بلدیاتی نظام مستحکم کرنے کیلئے بلدیاتی نمائندوں کا اعزازیہ بڑھانے کا فیصلہ کرلیا۔تفصیلات کے مطابق خیبرپختونخوا حکومت نے بلدیاتی نمائندوں کا اعزازیہ بڑھانے کا فیصلہ کیا ہے۔
جاری دستاویز کے مطابق خیبرپختونخوا لوکل گورنمنٹ منتخب نمائندوں کی اجرت اور الاؤنس رولز 2022 میں تبدیلی کی گئی ہے جس کے تحت تحصیل میئر اور چیئرمین کا اعزازیہ 100 فیصد بڑھایا جائے گا جبکہ تحصیل میئر کا اعزازیہ 40 ہزار سے بڑھا کر 80 ہزار کیا جائے گا، نیبر ہڈ کونسل اور ویلیج کونسل چیئرمین کا اعزازیہ 20 ہزارسے بڑھا کر 30 ہزار تک کیا جائے گا۔
دستاویز کے مطابق اعزازیہ میں اضافے کا مقصد بلدیاتی نظام کو مزید مستحکم کرنا ہے۔دستاویز میں کہا گیا کہ محکمہ خزانہ تحصیل میئر کیلئے سالانہ 344 ملین روپے سے زائد مختص کرے گا، نیبر ہڈ کونسل اور ویلیج کونسل چیئرمین کے اعزازیہ کیلئے 2 ہزار 412 ملین روپے مختص ہوں گے جبکہ بلدیاتی نمائندوں کے دفاتر کیلئے مختص ماہانہ کرایوں کی مد میں بھی اب فنڈز کا اجراء کیا جائے گا۔
