لاہور: لاہور ہائیکورٹ میں وقار یونس کی بطور چیئرمین پی سی بی ایڈوائزر تقرری کیخلاف درخواست دائر کردی گئی۔ تفصیلات کے مطابق لاہور ہائیکورٹ میں شہری مشکور حسین نے ایڈووکیٹ ندیم سرور کی وساطت سے چیئرمین پی سی بی محسن نقوی کے ایڈوائزر وقار یونس کی تقرری کیخلاف درخواست دائر کردی۔
درخواست میں وفاقی حکومت، پی سی بی اور وقار یونس کو فریق بناتے ہوئے موقف اپنایا گیا ہے کہ پی سی بی نے گزشتہ ماہ وقار یونس کو ایڈوائزر مقرر کیا لیکن ایک غیر معمولی قدم میں انہوں نے اس ماہ اب مذکورہ عہدے کیلئے ایک اشتہار دے کر درخواستیں طلب کی ہیں۔
درخواست میں کہا گیا ہے کہ محسن نقوی کی زیرقیادت پی سی بی نے وقار یونس کی خدمات حاصل کرنے کے عمل میں جو عجیب و غریب طریقہ اختیار کیا ہے وہ بورڈ کے انتظامی امور کے حوالے سے کئی سوالات کو جنم دیتا ہے۔ درخواست میں کہا گیا ہے کہ یہ بات قابل ذکر ہے کہ پی سی بی نے اسی طرز پر سابق جنوبی افریقی ٹیسٹ کرکٹر گیری کرسٹن (وائٹ بال کوچ) اور سابق آسٹریلوی ٹیسٹ فاسٹ مین جیسن گلیسپی (ریڈ بال کوچ) کو بطور کوچ مقرر کیا تھا۔
درخواست میں کہا گیا ہے کہ وقار یونس کی بطور ایڈوائزر تقرری قانون کے منافی ہے کیونکہ ان کی تقرری کیلئے اخبار میں کوئی اشتہار نہیں دیا گیا،استدعا ہے عدالت وقاریونس کی بطور ایڈوائزر ٹو چیئرمین پی سی بی تقرری کالعدم قرار دے۔
