لاہور: وفاقی وزیرداخلہ محسن نقوی نے کہا ہے کہ چینی شہریوں کی حفاظت و سہولت کیلئے جو ممکن ہوا کریں گے، 14 اگست سے چینی شہریوں کیلئے ویزا آن لائن ہو جائے گا، تاجروں کو سہولت میسر آئے گی۔ تفصیلات کے مطابق لاہور میں چینی قونصل جنرل ژاو شیرین کی سربراہی میں چینی بزنس کمیونٹی کے وفد نے وزیرداخلہ محسن نقوی سے ملاقات کی جس میں چینی شہریوں اور پراجیکٹس پر کام کرنیوالے عملے کی حفاظت کے اقدامات پر تفصیلی تبادلہ خیال کیا گیا، چینی تاجروں نے سکیورٹی پلان کے حوالے سے تجاویز دیں۔
وزیرداخلہ نے سفارشات کو نوٹ کیا اور قابل عمل تجاویز پر عملدرامد کی یقین دہانی کرائی۔اس موقع پر گفتگو کرتے ہوئے وزیر داخلہ نے کہا کہ چینی شہریوں کی حفاظت اولین ترجیح ہے، چینی شہریوں کو کاروبار کے لئے ہر ممکن سہولت دیں گے۔
انہوں نے کہا کہ سیکیورٹی پلان کے ایس او پیز چینی شہریوں کے تحفظ کیلئے بنائے ہیں، چینی شہریوں کی سہولت کیلئے جو کچھ ممکن ہوا وہ اقدام کریں گے۔ انہوں نے بتایا کہ چینی شہریوں کیلئے 14 اگست سے ویزا آن لائن ہو جائے گا جس سے چینی تاجروں کو بہت آسانی ہوگی۔
چینی قونصل جنرل ژاو شیرین نے کہا کہ پاکستان اور چین کے درمیان مثالی تعلقات ہیں،محسن نقوی میرے اور چین کے دوست ہیں، امید ہے کہ اس ملاقات کے مثبت نتائج سامنے آئیں گے۔
