اسلام آباد: وفاقی وزیر خزانہ سینیٹر محمد اورنگزیب نے کہا ہے کہ ملک میں آبادی بڑھنے کا بم پھٹ چکا ہے،موسمیاتی تبدیلی کے اثرات سے بچنے کےساتھ آبادی کو کنٹرول کرنا ہو گا، رواں ماہ کے آخر تک آئی ایم ایف ایگزیکٹو بورڈ سے سٹاف لیول معاہدے کی منظوری ہو جائےگی،آئی ایم ایف اور عالمی بینک کےساتھ مل کر موسمیاتی تبدیلی کے منصوبوں کی مانیٹرنگ کو بہتر بنایا جائے گا۔
تفصیلات کے مطابق اسلام آباد میں تقری سے خطاب کرتے ہوئے وفاقی وزیر خزانہ محمد اورنگزیب نے کہا ہے کہ رواں ماہ کے اختتام تک آئی ایم ایف ایگزیکٹو بورڈ سے اسٹاف لیول معاہدے کی منظوری ہو جائے گی، معاہدے کی منظوری کے بعد کلائمیٹ فنانسنگ پر بھی بات کی جائے گی۔
انہوں نے کہا کہ اکتوبر میں سالانہ میٹنگ کے دوران آئی ایم ایف اور ورلڈ بینک سے کلائمیٹ فنانسنگ پر بات ہو گی، پاکستان موسمیاتی تبدیلی سے متاثرہ ممالک کی فہرست میں شامل ہے۔ انہوں نے کہا کہ پاکستان کو موسمیاتی تبدیلی کے اثرات سے بچنے کے ساتھ آبادی کو کنٹرول کرنا ہو گا، ملک میں آبادی بڑھنے کا بم پھٹ چکا ہے۔
انہوں نے کہا کہ معاشی صورتحال بہتر بنانے کےلئے بجٹ، ٹیکس اقدامات، انرجی سیکٹر اور معیار زندگی بہتر بنانی ہو گی، وزارت خزانہ، وزارت موسمیاتی تبدیلی آئی ایم ایف اور عالمی بینک کے ساتھ مل کر کام کر رہی ہیں۔
انہوں نے کہا کہ آئی ایم ایف اور عالمی بینک کے ساتھ مل کر موسمیاتی تبدیلی کے منصوبوں کی مانیٹرنگ کو بہتر بنایا جائے گا، موسمیاتی تبدیلی کے اثرات سے بچنے کےلئے موسمیاتی تبدیلیوں پر مبنی پالیسیاں بنانا ہوں گی، ملکی معیشت کو بہتر بنانے کےلئے نجی شعبے کو اپنا کردار ادا کرنا ہوگا۔
