اسلام آباد: صدر مسلم لیگ (ن) نواز شریف نے کہا ہے کہ ملک کو بدنام، عدم استحکام پیدا کرنیوالوں کوجمہوریت سے دلچسپی نہیں، سات سال قبل قابو کئے گئے مسائل دوبارہ سنگین بحران بن چکے ہیں، دہشتگردی کے خاتمے کیلئے مسلح افواج ، سیکیورٹی اداروں کی حمایت کی جانی چاہئے۔
تفصیلات کے مطابق سینیٹ میں پارلیمانی لیڈر عرفان صدیقی نے ہفتہ کو صدر مسلم لیگ (ن) سے ملاقات کی جس میں موجودہ ملکی صورتحال اور باہمی دلچسپی دیگر امور پر تبادلہ خیال کیا گیا،عرفان صدیقی نے لیگی قائد کو سینیٹ میں پارلیمانی پارٹی کی کارکردگی بارے رپورٹ پیش کی۔
اس موقع پر گفتگو کرتے ہوئے سابق وزیراعظم نواز شریف نے کہا کہ سات سال پہلے جن مسائل پر قابو پا لیا گیا تھا آج وہ پھر سنگین بحران بن چکے ہیں۔انہوں نے کہا کہ ملک میں عدم استحکام پیدا کرنے اور بیرون ملک پاکستان کو بدنام کرنے والے عناصر کو نہ جمہوریت سے دلچسپی ہے نہ عوامی مسائل سے، یہ لوگ کسی بھی محاذ پر پاکستان کی کمزوری یا ناکامی کو اپنی سیاسی کامیابی خیال نہیں کرتے ہیں۔
انہوں نے کہا کہ سات سال قبل مہنگائی، لوڈ شیڈنگ ،دہشت گردی جیسے مسائل پر قابو پایا گیا، آئی ایم ایف سے نجات حاصل کی گئی مگر 2018ء میں ملکی تباہی و بربادی اور ہر شعبے میں زوال کا جو سلسلہ شروع ہوا اس نے عوام کیلئے سنگین مسائل پیدا کر دیئے جن پر قابو پانے کیلئے بہت وقت درکار ہے،انشاء اللہ مخلص اور محنتی قیادت تمام مشکلات پر قابو پا لے گی۔انہوں نے کہاکہ دہشت گردی کا مکمل خاتمہ کرنے کیلئے مسلح افواج اور سیکیورٹی اداروں کی مکمل حمایت کی جانی چاہئے کیونکہ امن و امان کا گہرا تعلق سرمایہ کاری اور ترقی و خوشحالی سے ہے، اس سلسلے میں پارلیمنٹ کو توانا کردار ادا کرنا چاہئے۔
