اسلام آباد: وفاقی وزیر اطلاعات و نشریات عطا تارڑ نے کہا ہے کہ مقبوضہ کشمیر میں بلا جواز بھارتی تسلط کا خاتمہ ہمارا مشن ہے، آزادی کسی بھی قوم کا بنیادی حق ہے، اس کے حصول کیلئے کشمیریوں کے ساتھ کھڑے ہیں۔ تفصیلات کے مطابق اسلام آباد میں وفاقی وزیر امور کشمیر وگلگت بلتستان انجینئر امیر مقام کے ہمراہ پریس کانفرنس کرتے ہوئے وزیر اطلاعات عطا تارڑ نے کہا کہ نہتے اور مظلوم کشمیریوں کی حمایت جاری رکھیں گے، وزیراعظم کا کشمیریوں کے حق خوداردیت کی حمایت پر وژن بالکل واضح ہے، 5 اگست 2019 کے بھارت کے کشمیر سے متعلق اقدامات غیرقانونی ہیں۔ انہوں نے کہا کہ بھارت کشمیرمیں انسانی حقوق کی خلاف ورزیاں کررہا ہے، مقبوضہ کشمیر پر بھارت کے غیرقانونی تسلط کا کوئی جواز نہیں ہے،آزادی کسی بھی قوم کا بنیادی حق ہے، ہم اس حق میں کشمیریوں کے ساتھ کھڑے ہیں۔
انہوں نے کہا کہ مقبوضہ کشمیر میں بلا جواز بھارتی تسلط کا خاتمہ ہمارا مشن ہے۔ انہوں نے کہا کہ اقوام متحدہ کی قراردادوں کے مطابق کشمیری عوام کو حق خوداردیت ملنا چاہئے، اس کیلئے ہم ہر سطح پر اپنی کوششیں جاری رکھیں گے۔
انہوں نے کہا کہ ہم نے سرینگر سے کشمیریوں کی آواز آپ تک پہنچانے کا بیڑہ اٹھایا ہے، ہم ان کے چہرے نہیں دکھائیں گے، صرف لوگوں کی آوازیں سنائیں گے۔اس موقع پر گفتگو کرتے وفاقی وزیر اور کشمیر انجینئر امیر مقام نے کہا کہ بھارت مقبوضہ کشمیر میں مظلوم کشمیریوں پر ظلم کے پہاڑ توڑ رہا،انسانی حقوق کی خلاف ورزی کررہا ہے۔ انہوں نے کہا کہ مقبوضہ کشمیر میں ہمارے بہن، بھائی اکیلے نہیں ہیں، تمام پاکستانی ان کے ساتھ ہیں۔
