اسلام آباد: ترجمان دفتر خارجہ ممتاززہرا بلوچ نے کہا ہے کہ دنیا کے ایک بھی ملک کا بھارتی اقدامات کو سپورٹ نہ کرناپاکستان کی کامیابی ہے، حق خود ارادیت کے حصول تک کشمیریوں کی حمایت جاری رکھیں گے۔تفصیلات کے مطابق نجی ٹی وی سے گفتگو کرتے ہوئے ترجمان دفتر خارجہ ممتاز زہرا بلوچ نے کہا کہ 5اگست 2019ء کو بھارت نے غیر قانونی اقدام کر کے کشمیر کی خصوصی حیثیت تبدیل کی جو عالمی قوانین کی کھلم کھلا خلاف ورزی ہے۔
انہوں نے کہا کہ کہ عالمی برادری مل کر بھارت پر زور دے کہ وہ ایسے اقدامات سے باز رہے اور کشمیریوں کو ان کا حق خودارادیت دے۔ انہوں نے کہا کہ دنیا میں ایک بھی ایسا ملک نہیں جو بھارت کے ان اقدامات کو سپورٹ کرتا ہو، ہم سمجھتے ہیں کہ یہ پاکستان کی بہت بڑی کامیابی ہے۔
انہوں نے کہا کہ کشمیریوں کی آواز کو آگے پہنچانا ہماری ذمہ داری ہے، جب تک کشمیریوں کو ان کا حق نہیں مل جاتا، پاکستانی عوام اور حکومت ان کی حمایت جاری رکھے گی۔
