اسلام آباد: چیئرمین پیپلز پارٹی بلاول بھٹو نے کہا ہے کہ مقبوضہ کشمیر کی خصوصی حیثیت کا خاتمہ یو این قراردادوں، عالمی قوانین کی صریح خلاف ورزی ہے، عالمی برادری مقبوضہ کشمیر میں انسانی حقوق خلاف ورزیاں رکوانے کیلئے کردار ادا کرے۔
تفصیلات کے مطابق یوم استحصال کشمیر کے موقع پر جاری بیان میں چیئرمین پیپلز پارٹی بلاول بھٹو نے کہا کہ بھارت مقبوضہ کشمیر میں جبر و بربریت کے سارے ہتھکنڈے آزما کر مظلوم کشمیریوں کی جدوجہد حق خودارادیت کو دبانے میں مکمل طور ناکام ہو چکا ہے۔
انہوں نے کہا کہ آرٹیکل 370اور 35اے کی منسوخی کے ذریعے دنیا کو پیغام دیا گیا کہ بھارت ریاستی ظلم و استبداد پر یقین رکھتا ہے، بھارت کے مذکورہ اقدام کا مقصد مقبوضہ وادی میں کشمیریوں کی اکثریت کو اقلیت میں تبدیل کرنا ہے۔
انہوں نے کہا کہ 5اگست 2019ء کو اٹھایا گیا بھارتی قدم اقوام متحدہ کی قراردادوں اور عالمی قوانین کی صریح خلاف ورزی ہے، پیپلز پارٹی تمام عالمی فورمز پر کشمیری عوام کے حقوق کی وکالت کے اپنے عزم پر ثابت قدم ہے۔ انہوں نے کہا کہ عالمی برادری کشمیر میں انسانی حقوق کی سنگین خلاف ورزیوں کو رکوانے کیلئے موثر اقدامات اٹھائے۔
انہوں نے کشمیری عوام کے عزم و بہادری کو خراج تحسین پیش کرتے ہوئے کہا کہ کشمیری عوام کی جدوجہد انصاف، وقار اور آزادی کی جدوجہد ہے،آئیے، جبر اور استحصال سے پاک، روشن مستقبل کی تلاش میں کشمیریوں کے ہاتھ میں ہاتھ دیں۔
