لاہور : وزیر اطلاعات پنجاب عظمی بخاری نے وزیراعظم شہباز شریف سے ایف آئی اے کا سائبر کرائم ونگ بند کرنے کا مطالبہ کرتے ہوئے کہاہے کہ بشری بی بی نے عدت میں نکاح کیا تو کیا یہ میری غلطی ہے؟، آخری سانس تک کیس لڑوںگی ، ہمیں یہ چیز روکنا ہوگی آج میں ہوں کل کوئی اور ہوگا۔
لاہور ہائیکورٹ کے باہر میڈیا سے گفتگو کرتے ہوئے وزیر اطلاعات پنجاب عظمی بخاری نے کہا کہ بشری بی بی کی کوئی ڈی فیک ویڈیو نہیں بنائی گئی، اب بشری بی بی نے عدت میں نکاح کیا تو کیا یہ میری غلطی ہے؟ کس نے انہیں عزتیں اچھالنے کا اختیار دیا ہے؟۔
انہوں نے کہا کہ وزیراعظم سے گزارش ہے ایف آئی اے کا سائبر کرائم ونگ بند کروا دیں، سائبر کرائم ونگ ٹکے کے کام کا نہیں میں تو تنگ آ گئی ہوں، سائبر ونگ کے پاس اپنے شعبے کی کوئی مہارت ہی نہیں ہے۔
انہوں نے کہا کہ میں زندگی کی آخری سانس تک اپنا کیس لڑوں گی، چیف جسٹس معاملے کو سمجھتی ہیں، میرے خیال میں چیف جسٹس صاحبہ معاملے کی تہہ تک پہنچنا چاہتی ہیں۔
انہوں نے کہا کہ ہمیں یہ چیز روکنا ہو گی ورنہ آج میں ہوں کل کوئی اور ہو گا، میرے بیٹے کے ساتھ میری تصویر لگا کر جو کچھ کہا جا رہا ہے، اس پر کسی کو شرم آئی؟۔انہوں نے کہا کہ فیک ویڈیوز کی تربیت نہ گھر کی ہے اور نہ ہی پارٹی کی ورنہ یہ سب ہمیں بھی کرنا آتا ہے۔ انہوں نے کہا کہ میں ہر حد تک جاؤں گی اور انصاف کے تمام دروازے کھٹکھٹاؤں گی۔
