راولپنڈی: رہنماء پی ٹی آئی علی محمد خان نے کہا ہے کہ عمران بھوک ہڑتال پر گئے تو ملک بھرمیں بھوک ہڑتالی کیمپ لگیں گے، ملک میں مہنگائی کیخلاف احتجاج ہو رہے، بانی پی ٹی آئی تو دو سال سے اقتدار سے باہر ہیں یہ سب کون کررہا ہے؟۔
تفصیلات کے مطابق اڈیالہ جیل کے باہر میڈیا سے گفتگو کرتے ہوئے رہنماء پی ٹی آئی علی محمد خان نے کہا کہ اڈیالہ جیل میں بانی پی ٹی آئی کا القادرٹرسٹ کیس کا ٹرائل ہوا وہاں ہم سب نے ان سے گفتگو کی ۔انہوں نے بتایا کہ بانی پی ٹی آئی نے کہا ہے کہ اگر میرے ساتھ ظلم بند نہ ہوا تو ساتھیوں سے مشورہ کرکے بھوک ہڑتال پر جاؤں گا۔ انہوں نے کہا کہ اگر عمران خان بھوک ہڑتال پر گئے تو پورے پاکستان میں بھوک ہڑتالی کیمپ لگیں گے۔
انہوں نے کہا کہ معاملات کاسیاسی حل کیوں نہیں نکل رہا؟۔انہوں نے کہا کہ عمران خان کسی صورت نہیں جھکیں گے ، انہوں نے اسلام آباد جلسے کے کارکنوں کیلئے حقیقی آزادی کا پیغام دیتے ہوئے کہا ہے کہ میرے لوگوں سے کہو حقیقی آزادی پر کوئی سمجھوتہ نہیں ہوگا۔
انہوں نے بتایا کہ عمران نے کہا ہے کہ غلامی کسی صورت منظور نہیں، یہاں ہر شخص اپنی رائے دینے میں آزاد ہے، پارٹی میں کوئی گروپنگ نہیں ہے صرف ایک گروپ ہے وہ بانی پی ٹی آئی گروپ ہے، بانی پی ٹی آئی نے کہا ہے کہ پارٹی میں آنے والوں کا فیصلہ میں کروں گا۔انہوں نے بتایا کہ بانی پی ٹی آئی نے کہا ہے بجٹ میں مہنگائی کا بم گرایا گیا، آج پورے ملک میں پٹرول کی قیمتوں ،مہنگائی کے خلاف احتجاج ہورہے ہیں ، بانی پی ٹی آئی تو 2سال سے اقتدار سے باہر ہیں،یہ سب کون کررہا ہے، بانی پی ٹی آئی کے دور میں مہنگائی بہانہ تھی۔
