لاہور:رہنماء پی ٹی آئی یاسمین راشد نے عدلیہ سے پی ٹی آئی پر ہونیوالے مظالم کا نوٹس لینے کا مطالبہ کرتے ہوئے کہا ہے کہ جمہوریت کا گلہ گھونٹنے کا نقصان صرف پی ٹی آئی نہیں ہر سیاسی جماعت کو ہوگا، پرامن احتجاج جمہوریت کا حسن ہے، ظلم وجبر سے عمران کی محبت عوام کے دلوں سے نہیں نکالی جاسکتی۔ تفصیلات کے مطابق اے ٹی سی لاہور کے باہر میڈیا سے گفتگو کرتے ہوئے رہنماء پی ٹی آئی یاسمین راشد نے صحافیوں کو مراسلہ تھماتے ہوئے اعلی عدلیہ سے پی ٹی آئی پر ہونیوالے مظالم کا نوٹس لینے کا مطالبہ کرتے ہوئے کہا کہ جمہوریت کا گلا گھونٹا جارہا ہے، لوگوں کی آواز بند کی جارہی ہے، اس پر نظر ثانی کر کے ظلم روکا جائے۔ انہوں نے کہا کہ یہ ظلم پاکستان کو تباہ کر دے گا، ظلم اور جبر سے کسی کے دل سے عمران خان کی محبت نہیں نکالی جاسکتی۔
انہوں نے کہا کہ جو ظلم پی ٹی آئی کارکنوں نے برداشت کیا اس کی تاریخ میں مثال نہیں ملتی، 8فروری کو لوگوں نے نکل کر دنیا کو بتا دیا کہ عمران خان ہی ہمارا لیڈر ہے۔
انہوں نے کہا کہ پی ٹی آئی عمران خان کے حقیقی آزادی کے نعرے کے ساتھ کھڑی تھی، کھڑی ہے اور کھڑی رہے گی۔انہوں نے کہا کہ فارم 47کی حکومت لوگوں کو قبول نہیں، چوری مینڈیٹ واپس کیا جائے تاکہ اصل حکومت ملک کی باگ ڈور سنبھالے۔انہوں نے کہا کہ فارم 47کی حکومت جس طرح جمہوریت کا گلا گھونٹ رہی ہے اس کا نقصان پی ٹی آئی کو نہیں ہر سیاسی جماعت کو ہو گا، تاریخ گواہ ہے جو کسی کیساتھ زیادتی کرے گا وہ واپس اس کے آگے بھی آئے گی۔ انہوں نے کہا کہ آپ احتجاج نہیں روک سکتے کیونکہ پرامن احتجاج جمہوریت کا حسن ہے ۔انہوں نے کہا کہ لوگوں کو زبردستی آئی ایم ایف کا بنایا گیا بجٹ قبول کرنے کا کہا جارہا ہے۔
