میڈرڈ: سعودی وزیر خارجہ شہزادہ فیصل بن فرحان نے غزہ میں عالمی فوج کی تعیناتی کی حمایت کرتے ہوئے کہا ہے کہ غزہ کی پٹی میں فی الحال جنگ بندی کے آثار دکھائی نہیں دے رہے۔ غیر ملکی میڈیا کے مطابق میڈرڈ میںخارجہ امور بارے کانفرنس سے خطاب کرتے ہوئے سعودی وزیر خارجہ شہزادہ فیصل بن فرحان نے کہا کہ ہم اقوام متحدہ کے فیصلے کی روشنی میں غزہ میں عالمی فوج کی تعیناتی کی حمایت کرتے ہیں جس کا مقصد فلسطینی اتھارٹی کی مدد ہو گا۔
انہوں نے کہا کہ غزہ میں فی الحال جنگ بندی کے کوئی آثار دکھائی نہیں دے رہے، ہمیں غزہ اور غرب اردن میں روزانہ ایسے مظاہر دیکھنے کو ملتے ہیں جو مسئلہ فلسطین کے دو ریاستی حل کو خطرات سے دوچار کر رہے ہیں۔انہوں نے کہا کہ سپین سمیت دیگر یورپی ممالک کے فلسطینی ریاست کو تسلیم کرنے کے اعلانات افق میں گم ہوتے دو ریاستی حل کے تناظر میں امید کی ایک کرن ہیں۔
انہوں نے کہا کہ لبنان میں مستحکم سیاسی منظر نامہ دکھائی نہ دینے کے باعث ہمیں لبنان جنگ کا دائرہ پھیلنے کا اندیشہ ہے ۔ انہوں نے کہا کہ امید ہے غزہ جنگ رکنے پر لبنان اور اسرائیل کے درمیان سرحدی کشیدگی روکنے میں مدد ملے گی۔
