اسلام آباد:رہنماء پیپلز پارٹی شازیہ مری نے کہاہے کہ 5 جولائی 1977ء قومی تاریخ کا سیاہ دن ، نقصان کبھی نہیں بھرسکتے، آمر نے اقتدار پر قبضہ کر کے ملک کو دہشت گردی، کلاشنکوف ،منشیات کے کلچر کی دلدل میں دھکیلا ،آئین ،پارلیمانی نظامِ جمہوریت کے تحفظ ،مساوات پر مبنی معاشرے کی تکمیل کیلئے جدوجہد جاری رکھیں گے۔ایک بیان میں ترجمان پیپلز پارٹی شازیہ مری نے کہا کہ 5جولائی 1977ء قومی تاریخ کا سیاہ ترین دن ہے، اس دن کا نقصان ہم کبھی نہیں بھرسکتے، 5جولائی کو ڈکٹیٹر ضیاء نے آئینی و جمہوری حکومت کا تختہ الٹا اور قبضہ کر کے ملکی ساکھ و ترقی کو ناقابل تلافی نقصان پہنچایا۔
انہوں نے کہا کہ ڈکٹیٹر ضیاء نے ملک کے اندر مذہب کی آڑ میں انتہاء پسندی اور تقسیم کے بیج بوئے، آمر نے ملک کو دہشت گردی، کلاشنکوف اور منشیات کے کلچر کی دلدل میں دھکیلا اورانسانی حقوق کی پامالی کی۔انہوں نے کہا کہ شہید بھٹو کا قصور یہ تھا کے وہ ایک بہادر اور مقبول ترین لیڈر تھے، جمہوریت کا مطالبہ کرنے والوں پر جس طرح مظالم جنرل ضیا نے ڈھائے اس پر انسانیت بھی شرمندہ ہے، اسی آمر نے شہید بینظیر بھٹو اور مادرِ جمہوریت بیگم نصرت بھٹو کو جیل میں قید و بند کی صعوبتیں دیں مگر وہ مقابلہ کر کے سرخرو ہوئیں۔
انہوں نے کہا کہ جیالوں کو سرخ سلام پیش کرتے ہیں جنہوں نے آمر کے دور میں جمہوریت کی خاطر کوڑے کھائے، قید و بند کی صعوبتیں جھیلیں اور جامِ شہادت نوش کیا۔ انہوں نے کہا کہ آج اس ملک میں جمہوریت پیپلز پارٹی کے قائدین اور کارکنوں کی قربانیوں کے مرہون و منت ہے، آمروں اور کٹھ پتلیوں کا دور اب ماضی بن چکا ہے۔انہوں نے کہا اب پاکستان کے حال اور مستقبل میں صرف جمہوریت ہے جس کیلئے پرعزم ہیں۔
انہوں نے کہا کہ پیپلز پارٹی 1973ء کے متفقہ آئین ،پارلیمانی نظامِ جمہوریت کے تحفظ اور مساوات پر مبنی معاشرے کے قیام کے مشن کی تکمیل کیلئے جدوجہد جاری رکھے گی۔
