پشاور: مشیر اطلاعات خیبر پختونخوا بیرسٹر سیف نے کہا ہے کہ شریف خاندان کی کرسی کی لڑائی میں عوام رل رہے ہیں، مریم کے آنسو اختلافات کا ثبوت ہیں،مریم کی توجہ عمران، پی ٹی آئی خواتین کارکنان کیخلاف انتقامی کارروائیوں پر مرکوز ہے، ان کی ٹک ٹاک اور اداکاری شریف خاندان کی آخری کارکردگی ثابت ہوگی۔تفصیلات کے مطابق ایک بیان میں مشیر اطلاعات خیبرپختونخوا بیرسٹر سیف نے کہا کہ مریم کہتی ہیں انہیں کام نہیں کرنے دیا جا رہا، وہ کون ہے جو آپ کو کام نہیں کرنے دے رہا؟، آپ کے چچا اور ابا جی کی حکومت میں آخر یہ فریاد کیوں؟۔
انہوں نے کہا کہ مریم کے بہتے آنسو خاندان شریفیہ میں اختلافات کا ثبوت ہیں، خاندان شریفیہ میں وزارت عظمیٰ کی جنگ جاری ہے۔ انہوں نے کہا کہ نواز شریف چوتھی بار وزیراعظم بننے کیلئے سر توڑ کوشش کر رہے ہیں۔ نواز شریف گروپ بمقابلہ شہباز شریف گروپ آپس میں دست و گریباں ہیں، شہباز شریف کی گردن اسحاق ڈار اور رانا ثنااللہ کے ذریعے دبائی ہوئی ہے جبکہ مریم نواز کا ہدف بھی شہباز شریف اور ان کی حکومت ہے۔
انہوں نے کہا کہ کرسی کی اندرونی لڑائی میں عوام رل رہے ہیں،عوامی مسائل کی خاندان شریفیہ کو بالکل پروا ہ نہیں۔انہوں نے کہا کہ مریم کی تمام توجہ پی ٹی آئی کی خواتین کارکنان اور عمران خان کیخلاف انتقامی کارراوئیوں پر مرکوز ہے، عنقریب مریم نواز اڈیالہ جیل میں قید بامشقت کاٹ رہی ہوں گی۔
انہوں نے کہا کہ پنجاب جیسا اہم صوبہ غیر سنجیدہ ٹک ٹاکر سہیلیوں کے حوالے کر دیا گیا ہے، مریم نواز کی ٹک ٹاک اور اداکاری شریف خاندان کی آخری کارکردگی ثابت ہوگی۔
