موغا دیشو:دہشت گرد تنظیموں سے منسلک گروپ نے موغا دیشو کے ساحل پر حملہ کر کے 32 افراد کو ہلاک کردیا۔ غیر ملکی میڈیا کے مطابق نے دہشت گرد تنظیموں سے منسلک گروپ نے صومالیہ کے دارالحکومت موغا دیشو کے ساحل پر حملہ کر کے 32 افراد کو ہلاک اور متعدد کو زخمی کردیا۔
صومالی حکام کے مطابق الشباب اور القاعدہ سے منسلک عسکری گروپ نے اپنے ریڈیو اسٹیشن کے ذریعے مشہور لائیڈو بیچ پر حملے کی ذمہ داری قبول کی ہے۔
حکام کے مطابق حملے کی اطلاع ملتے ہی سکیورٹی اہلکار جائے وقوعہ پر پہنچ گئے اور جوابی کارروائی میں 5حملہ آوروں کو مار ڈالا جبکہ اس دوران 6حملہ آوروں نے خود کو دھماکہ خیز مواد سے اڑا لیا جس کے نتیجے میں ساحل سمندر پر موجود مقامی افراد ہلاک ہوئے۔
پولیس ترجمان کے مطابق حملے میں اب تک 32عام شہریوں کے ہلاک ہونے کی تصدیق ہوئی ہے جبکہ 60سے زائد زخمی ہیں جن میں سے بعض کی حالت تشویشناک ہونے سے ہلاکتوں میں اضافے کا خدشہ ہے۔
